Primeiru Vise Governu BCTL, Venancio Alves Maria. Imajen/António Gonçalves.

DÍLI, 02 maiu 2019 (TATOLI)-Fundu Petróleu (FP) Timor-Leste nian ne’ebé termina iha loron 31 Marsu 2019, sa’e ba biliaun US$16,98 kompara ho trimestre antes ho biliaun US$15,80.

Vise-Governadór Banku Sentrál Timor-Leste (BCTL-sigla portugés), Venancio Alves Maria, informa, hosi biliaun US$16,98 ne’e sei inklui ho millaun US$650 ne’ebé hasai tiha ona iha Abríl hodi sosa partisipasaun Timor-Leste nian iha Greater Sunrise tanba relatóriu ne’e sei kobre Marsu nian.

“Reseita ne’ebé ita simu mai husi taxa no royalty (realeza) totál millaun US$240,27 no osan sira ne’ebé maka sai millaun US$4 kobre kustu jestaun durante trimestre ida ne’e no durante trimestre ne’e seidauk iha transferénsia ba orsamentu Estadu tanba seidauk simu instrusaun hosi Ministériu Finansa”, informa Venancio Alves Maria, ohin, liuhosi konferénsia imprensa iha edifísiu BCTL,  Dili.

Sobre retornu portofóliu ka karteira iha termu persentajen 5,90% kompara ho nia referénsia mak 5,95%. “Trimestre ida ne’e, ita hetan mós lukru hosi investimentu Fundu Petróleu ho totál millaun US$936”, hateten Venancio Alves Maria.

Iha biban ne’e mós Vise-Governadór BCTL  haktuir ba desizaun Estadu Timor-Leste atu sosa interese ConocoPhillips no Shell Energy iha konsórsiu (joint venture) iha Greater Sunrise (GS), BCTL simu instrusaun hosi Ministériu Finansa iha inísiu Marsu 2019 no prosesu hotu konklui iha Marsu  nia klaran no iha loron 10 Abríl ne’e, BCTL transfere ona millaun US$650 ba Timor Gap nia subsidiáriu haat hodi bele investe tutan ba konsórsiu Greater Sunrise tuir desizaun Estadu nian.

Instrusaun ministra nian suporta ho diploma ministeriál no hetan apoiu hosi rezolusaun Konsellu Ministru kona-ba investimentu foun iha kategoria alternativa liuhosi Timor Gap uza porsentu 5 alokasaun investimentu FP tuir artigu 15.4 Lei FP no tuir mós Lei Atividade Petróleu ne’ebé altera ona.

Tuir perspetiva BCTL nian katak transferénsia millaun US$650 ne’ebé halo ne’e trata hanesan investimentu iha Timor Gap.

“Publikasaun Akordu Jestaun atualizadu ne’ebé maka asina hosi BCTL ho Ministériu Finansa ninia investimentu iha Timor Gap ne’e nia jurus  porsentu 4.5 (kada tinan) ho ninia durasaun tinan 8”, esplika Venancio Alves Maria.

Ho jurus ne’e, tuir Venancio Alves Maria, BCTL sei rekoñese nafatin pur ano iha livru relatóriu Fundu Petróleu, katak jurus ne’ebé maka simu karik hosi Timor Gap mak hanesan ne’e, mas sei rekoñese periódikamente depois de tinan ualu (8) sira iha períodu grasa (grace period) maka foin selu.

Jornalista: Maria Auxiliadora

Editór: Francisco Simões

HAKEREK NO HATÁN

Please enter your comment!
Please enter your name here