TL iha Pozisaun Forte Influensia Desizaun ba Dezenvolvimentu Greater Sunrise

0
249
Plenaria Parlamentu Nasionál (PN). Imajen/ António Gonçalves

DILI,(TATOLI)–Ho esforsu Governu nian ne’ebé mak konklui ona sosa asaun 30% husi kompañia ConocoPhilips no 26,56% husi Shell, marka Timor-Leste nia pozisaun forte hodi influensia desizaun ba dezenvolvimentu kampu mina matan Greater Sunrise (GSR).

Governu Timor-Leste ne’ebé lidera husi Primeiru Ministru, Taur Matan Ruak, Tersa (16/4/2019), konklui ona prosesu sosa asaun ConocoPhillips no Shell iha kampu Greater Sunrise nian, ho nune’e, reprezentante povu iha Parlamentu Nasionál (PN) hato’o sira nia votu apresiasaun hodi aprezenta katak ho pasu ida ne’e lori Timor-Leste marka ona lian forte bainhira atu influensia desizaun.

“Hanesan lider Partidu Demokrátiku konsidera ne’e di’ak tanba bainhira ita sosa ona partisipasaun ne’e, Timor-Leste bainhira tur iha meza atu halo negosiasaun kona-ba dezenvolvimentu Greater Sunrise, ita iha lian ne’ebé forte ona no bele foti desizaun ruma tanba ita iha diretu”, tenik membru PN husi Bankada PD, Adriano do Nascimento, ba jornalista sira iha Uma Fukun PN.

Adriano do Nascimento hatutan, desizaun Governu konklui ona prosesu ne’e, tuir ona prosedimentu ne’ebé sai preokupasaun ba PN durante ne’e, tanba bainhira selu tarde sei hetan multa, maibé agora halo ona pagamentu signifika kestaun ne’ebé mak durante ne’e sai preokupa rezolvidu ona.

“Agora ita hein Governu tuir mai tau iha asaun kona-ba atu dada kadoras mai tuir interese nasaun nian. Kestaun ba ita mak agora oinsá buka osan atu lori kadoras mai Timor-Leste no prepara infraestrutura bázika iha Tasi Mane”, tenik Deputadu Adriano do Nascimento. 

Nia mós dehan, Governu tenke hamosu polítika ida ne’ebé mak bele tetu konsekuénsia hotu em termu limitasaun osan ne’ebé mak iha no meius atu buka empréstimu ou dalan seluk.

“Alem de buka osan atu dada kadoras, tenke haree mós impaktu no tenke halo estudu jeotékniku para antesipa kustu”, nia tenik tan.

Husi  sorin seluk,  membru PN husi Bankada CNRT, Maria Barreto liuhosi nia intervensaun iha plenária, felisita Governu, liu-liu ekipa sira ne’ebé  involve iha prosesu ne’e.

“Parabéns ba Povu Timor-Leste no parabéms ba reprezentante Espesiál Governu, Xanana Gusmão ne’ebé halo ona prosesu ba sosa partisipasaun iha Greater Sunrise”, hateten Deputada Maria Barreto.

Ekipa ne’ebé lidera husi Reprezentante Espesiál Timor-Leste nian ba Kestaun Petrolífera sira, Kay Rala Xanana Gusmão, konklui ona prosesu sosa partisipasaun Greater Sunrise nian ho montante millaun US$650, nune’e Timor GAP, hanesan kompañia petrolífera nasionál  iha ona partisipasaun hamutuk 56,56%.

Haktuir iha portal ofisial Governu, Primeiru-Ministru, Taur Matan Ruak, felisita parte hirak ne’ebé mak envolve tanba remata ona tranzasaun sira ne’ebé hala’o ho susesu no hein ho espetativa ba diskusaun foun ho membru konsórsiu seluk kona-ba oinsá atu dezenvolve lalais rekursu sira Greater Sunrise nian.

Reprezentante Espesiál Timor-Leste nian ba Kestaun Petrolífera sira, Kay Rala Xanana Gusmão, deklara katak, konkluzaun husi akizisaun ne’e marka fin husi prosesu ida ne’ebé hahú hafoin asinatura Tratadu nian kona-ba Ketan Tasik entre Austrália no Timor-Leste. 

Akizisaun ho valór porsentu 56,56 ne’ebé Timor GAP simu ona, sei permite atu avansa diskusaun sira entre konsórsiu Sunrise no autoridade sira husi Austrália no mós Timor-Leste nian kona-ba Kontratu foun Fahe Produsaun husi Greater Sunrise ne’ebé sei jere kampu mina nian sira-ne’e hafoin tratadu ne’e hahú vigora. 

Tratadu ne’e mós sei fó dalan ba kontinuidade negosiasaun konsórsiu Sunrise nian, agora ho Timor GAP, kona-ba konseitu husi dezenvolvimentu Greater Sunrise no konstrusaun planta Gás Naturál Likefeitu (GNL) iha Beasu, iha parte tasi-mane Timor-Leste nian.

Governu Timor-Leste sei servisu nafatin atu dezenvolve Greater Sunrise lais liután, hodi benefisia parte hotu-hotu ne’ebé iha interese.Kampu sira husi gás naturál no kondensadu Sunrise no Troubadour nian, ne’ebé hamutuk hanaran kampu sira Greater Sunrise, lokaliza besik kilómetru 150 iha sudeste Timor-Leste nian no kilómetru 450 iha noroeste Darwin, iha Territóriu Norte Austrália nian.

Timor Gap halo parte ba parseiru sira hosi Konsórsiu Greater Sunrise: Woodside (operadora) ho ida partisipasaun hamutuk porsentu 33,44 no Osaka Gas ho porsentu 10.

Jornalista: Julia Chatarina

Editór: Francisco Simões

HUSIK IDA HATÁN