Timor-Leste Sai Ezemplu Ba Nasaun Seluk

0
243
Relatora Victoria Tauli-Corpuz. Foto: Mehr News Agency

DILI, (TATOLI)-Relatora Espesiál Direitu Ema Indíjena, Victoria Tauli-Corpuz konsidera katak Timor-Leste bele sai ezemplu inspirasionál ba nasaun seluk tanba hafoin “kore-an” husi konflitu, halo ona progresu lubuk hodi estabelese legál no estrutura (framework) institusionál no iha kompromisu forte ba padraun direitu umanu internasionál no polítika dezenvolvimentu sosiál nasionál nian.

“Ha’u impresionadu ho orgullu timoroan sira nian ba eransa kulturál no oinsá prátika indíjena sira traduzidu ba benefísiu importante iha konservasaun ambiente. Sira ne´e hotu bele serve hanesan ezemplu inspirasaun ba nasaun seluk”, hateten Relatora Espesiál Direitu Ema Indíjena, Victoria Tauli, liu husi komunikadu imprensa ba Ajénsia TATOLI, Kuarta (17/04/2019).

Nia konsidera, língua no kultura indíjena timoroan sira nian partikularmente diversu ka oioin no definidu iha kolonializasaun no okupasaun. Maioria husi nasaun, fahe valór indíjena no fiar espirituál ne’ebé refleta ba iha kbiit instituisaun lokál sira, justisa kostumeira no jestaun rai nian.

La hanesan povu indíjena barak, Victoria Tauli hatutan, timoroan sira atinje auto-determinasaun em termos de polítika. Timor-Leste apoiu adoptasaun deklarasaun direitu ba ema indíjena sira iha Asembleia Nasaun Unida iha 2007 no Konstituisaun kontein provizaun oioin ne´ebé esplisitamente rekoñese kostume, valór tradisaun no eransa kulturál.

“Governante sira-nia konvite ba ha´u-nia vizita tuir mai subliña rekoñesimentu ba importánsia anexadu ba direitu povu indíjena iha nasaun”, refere komunikadu ne´e.

“Ne´e hateten, ha´u mós nota ona katak nasaun to´o akordu ida ho ninia legadu koloniál ne´ebé kria prekonseitu inerente entre timoroan sira kontra sira-nia kultura rasik. Ida ne´e dalaruma fó impaktu ba dezenvolvimentu inkluzivu no kulturalmente adekuadu ba polítika nasionál no lejizlasaun”,  hateten Victoria Tauli.

Vizita Relatora Espesiál Direitu Ema Indijena, Victoria Tauli mai Timor-Leste no sei estadia iha Timor-Leste hahú  iha loron 08-16 Abril, tanba konvida husi Governu Timor-Leste.

Relatora espesiál ne’e nu’udar peritu independente ne´ebé Konsellu Direitu Umanu nomeia. Nia haree ba respeitu no protesaun ba ema indíjena iha mundu tomak, no katak sira bele goza sira-nia direitu umanu tomak.

Durante iha Timor-Leste, Victoria Tauli-Corpuz hasoru malu ona ho governu, ofisiál husi instituisaun estadu, sosiedade sivíl, Organizasaun Nasaun Unida (ONU) iha Timor-Leste iha Díli.

Durante estadia, vizita ona terrenu hanesan komunidade sira iha Ermera, Liquiça no Ataúro, tanba iha interese hodi haree justisa kostumáriu/informál, impaktu mudansa klimátika, medida hodi adopta no hamenus impaktu ne´e, konservasaun, edukasaun no kestaun rai nomós asuntu seluk relasaun ho nia mandatu.

Relatora Victoria Tauli-Corpuz hanesan lider indíjena husi grupu étniku Kankanaey Igorot iha Rejiaun Kordilleira, Filipina. Nu´udar ativista indíjena, nia serbisu liu dékada tolu hodi harii movimentu ema indíjena no mós halo advokasia ba direitu feto. Nia serbisu nu´udar ONU nia relatora espesiál kona-ba ema indíjena dezde 2014.

Jornalista: Rafy Belo

Editór: Francisco Simões

HUSIK IDA HATÁN