ILIOMAR, (TATOLI)-Sekretáriu Estadu Komunikasaun Sosiál (SEKOMS), Merício Juvinal dos Reis “Akara” Sábadu (13/4/2019), halo sorumutu ho autoridade lokál Postu Administrativu Iliomar, Munisípiu Lautém, hodi introduz planu no programa SEKOMS ninian, liuliu oinsá bele mós harii torre Rádiu Televizaun Timor-Leste (RTTL-EP) nian ida iha área foho Naunil, Iliomar nian.
Hafoin sorumutuk ho autoridade lokál, SEKOMS hamutuk ho Xefe Gabinete, Júlio Gonçalves, Diretór Nasionál Sentru Rádiu Komunidade, Abel da Conceição, no mós tékniku balun husi RTTL-EP hakur to’o foho Naunil nia tutun hodi observa direta fatin refere.
“Ita hatene katak informasaun ne´e ema hothotu hetan. Entaun governu iha planu atu harii tan torre foun iha parte leste. Iha parte leste ne´e torre rua; ida iha Munisípiu Baucau, ida iha Munisípiu Lautém. Iha Lautém iha foho ne´ebé mak aas oituan, ne´e mak iha Naunil, ne´e para bele fasilita informasaun”, informa Xefe Gabinete, Júlio Gonçalves, hodi reprezenta SEKOMS, iha Postu Administrativu Iliomar, Munisípiu Lautém.
Reprezentante SEKOMS ne´e konfirma, bainhira monta torre iha Naunil, asesu informasaun ne´e la´ós de´it ba Iliomar, maibé Munisípiu Viqueque bele asesu mós informasaun.
“Durante ne´e, ita hatene katak komunidade barak husi parte Iliomar, Uato-Carbau ne´e la asesu informasaun. Bainhira ita monta ona torre iha parte Iliomar ne´e, ita garante katak iha postu administrativu tolu ka haat bele asesu ona informasaun husi RTTL”, Júlio hatutan.
Xefe Júlio Gonçalves mensiona mós katak SEKOMS mós iha programa “Naroman Ba Suku” atu ekipa husi nasionál tuun ba suku hodi disemina informasaun. Tanba suku balun seidauk asesu ba televizaun, internet. Tanba ne’e, ekipa nasionál sira presiza tuun mai atu bele fó sai informasaun balun, liliu hanesan atividade governu nian.
Nia reforsa, dezenvolvimentu balun ne´ebé mak la´o ona, ema balun la hatene. Sira balun ne´ebé hela iha área rurál ne´e la hatene informasaun kona-ba suku balun, atividade balun hanesan, purezemplu munisípiu balun infraestrutura, estrada la´o ona, sira balun la hatene.
“Naroman suku, ita lori mai suku para bele fó esplikasaun ba sira katak Timór komesa la´o ona ba oin, harii ona dezenvolvimentu nasionál. Ita la´ós destaka maibé la´o ona ba oin”, dehan Xefe Gabinete.
Iha fatin hanesan, Administradór Postu Administrativu Iliomar, João Batista Ruas ba jornalista sira katak, durante ne´e komunidade barak la asesu kanál RTTL no ba buka de´it asiste informasaun RTTL nian iha komunidade balun ne´ebé mak iha parabola.
“Graças a Deusho ita-boot sira mai iha ne´e, tékniku sira mós mai, para komunidade bele rona rádiu no haree televizaun iha ninia uma rasik,” espera Administradór Postu Administrativu Iliomar.
Durante sorumutu ho autoridade Administradór Postu Administrativu Iliomar, SEKOMS mós distribui jornál sira hanesan jornál Diáriu, Timor Post, STL (Suara Timor Lorosa´e), Indepedente, Dili Post, Business Timor no mós seluk tan.
Jornalista: Rafy Belo
Editór: Francisco Simões
