SEA Atribui Lisensa Ambientál Ba Emprezáriu Sira

0
29
Sekretáriu Estadu Ambiente Demétrio de Amaral de Carvalho. Imajen Egas Cristovão

DILI, (TATOLI) – Sekretáriu Estadu Meiu Ambiente (SEA), Demétrio Amaral, atribui lisensa ambientál ba emprezáriu sira ho kategoria A, B no C.

“Halibur ita boot sira hodi ofisializa atribui lisensa ba ita boot sira. Meiu ne’e hakarak sensibiliza importánsia públiku nian kona-ba lisensa ambientál hodi garante dezenvolvimentu ida ne’ebé di’ak ba Timor-Leste”, dehan Demétrio iha ninia servisu fatin, sesta, (12/4).

Nia hatutan: “Ita boot sira hanesan emprezáriu nasionál ne’ebé koñese papél emprezáriu nian, nune’e lisensa ne’ebé imi hetan, tenke uza ho didiak”.

Governante hatete, nain ba empreza Esperansa Timor Oan (ETO), Nilton Gusmão, hosi inisiu kedan hetan lisénsa ambientál, ohin halo renovasaun, atividade empreza ETO maka armazein mina iha Hera.

Ida ne’e ezemplu ba emprezáriu sira seluk iha Timor-Leste. “Ita hakarak entidade hotu respeita lei sira, hanesan dekretu lei númeru 5/2011 kona-ba lisensiamentu nian”, hateten.

Tuir nia iha emprezáriu barak maka seidauk tuir prosesu ne’e, governu anteriór notifika lubuk ida no governu atuál identifika ona atu notifika tan balun.

Tanba ne’e, nia husu ba emprezáriu ne’ebé kaer projetu boot sira, hanesan ótel ka setór privadu sira atu prosesa hodi hetan lisensa atu asegura atividade ho baze lei. Uza lisensa atu halo atividade ho di’ak, nune’e bele mantein no salva guarda ambiente.

Iha fatin hanesan, emprezáriu Nilton Gusmão, akresenta meiu-ambiente iha ona diskusaun kleur, kuandu hahú projetu konstrusaun bomba gazolina iha Balide, to’o agora Empreza ETO kumpre nafatin regra, tanba regra maka bele regula ita no garante investimentu ne’ebé la’o hodi asegura ambiente ne’ebé ita moris ba.

Tuir Nilton tenke buka konvense malu bebeik atu empreza ka kualker entidade privada sira buka atu respeita regra Estadu nian. Rai ne’e ita maka moris ba, la sala ita buka kumpre rekezitu sira.

Entretantu, emprezáriu hirak ne’ebé hetan lisensa maka kompañia ETO, Restaurante Morena, Miragold Apartments, Peace Coffee, Depot Tiga Putra, Nilo Catering no seluk tan.

Tuir dekretu lei númeru 5/2011, ne’ebé públika iha 9 fevereiru, kona-ba lisensiamentu ambientál. Hosi lei tabele klasifikasaun kona-ba projetu ho kategoria A mak setór mineiru, indústria petrolífera, enerjia, indústria, transporte, konstrusaun sivíl, saneamentu, agua, agrikula, pekuaria, floresta, turizmu, defeza, seguransa no fatór lokalizasaun.

Klasifikasaun ba projetu ho kategoria B mak indústria, transporte, konstrusaun sivíl, saneamentu, agua, agrikula, pekuaria, floresta, turizmu, defeza no seguransa.

Jornalista: Zezito Silva

Editora: Rita Almeida

HUSIK IDA HATÁN