Ministériu Balun Implementa Ona Relatóriu CAVR-CVA

0
168
Konsileiru Konsellu Imprensa (KI) ba asuntu Dezenvolvimentu Mídia, Hugo Fernandes

DILI,(TATOLI) –Durante tinan 10 resin ona, hahú husi 2005 mai to’o ohin loron, ministériu balun komesa implementa ona relatóriu Komisaun Akollamentu Verdade no Rekonsiliasaun (CAVR-sigla portugés) no Komisaun Verdade no Amizade (CVA-sigla portugés).

Diretór Ezekutivu Seentru Nasionál Chega (CNC-sigla portugés), Hugo Maria Fernandes, hafoin hasoru malu ho Primeiru Ministru, Taur Matan Ruak, ohin, iha Palásiu Governu, hateten, husi  2005 to’o 2008, la iha implementasaun husi entidade governu sira ba rekomendasaun iha relatoriu CAVR-CVA, maibé agora ministériu balun komesa implementa ona.

Hugo Fernandes hateten, CNC halo nafatin  kooperasaun ho ministériu sira, liuliu atu asegura implementasaun no rekomendasaun Chega nian. nune’e, CNC halo akordu kooperasaun hirak husi Ministériu Edukasaun atu dezenvolve matéria kurríkulu istória nian, direitus umanus no edukasaun sidadania, nune’e mós Ministériu Solidariedade Sosiál, atu buka ema lakon, rejistu fila fali ema hirak ne’ebé vulneravel liu, hanesan mós Ministériu Negósiu Estranjeiru no Kooperasaun, hodi haree fila fali rekomendasaun sira ne’ebé relasiona ho Indonézia, inklui Ministériu Justisa, atu garante apoiu ba oan sira ne’ebé maka inan sira ne’ebé hetan violasaun sexual husi krime pasadu sira.

Iha tinan ida ne’e, Hugo afirma sente kmaan tebes iha governu da-ualu nia polítika, katak oinsá Sentru Chega tenke hetan apoiu husi ministériu sira atu halo nia implementasaun ba rekomendasaun hirak ne’e.

Dezafiu seluk maka to’o agora seidauk iha ema lisensiatura ka mestradu ba area arkivu nian, la’ós tanba nia iha esperiénsia de’it hodi servisu iha arkivu.

Iha mós difikuldade seluk hanesan la iha timoroan ida ne’ebé ho nia background estudu kona-ba istória, maske Timor-Leste iha universidade 10 resin iha Dili laran, maibé la iha universidade ida maka loke departamentu istória nian. 

“Bainhira ita hanoin oinsá maka atu prezerva memória pasadu, hakerek istória, entaun ita sei iha dezafiu atu hetan eskritór timoroan nian ne’ebé maka di’ak”, Hugo hateten.

 “Ami hato’o hotu ona ba Primeiru Ministru no nia nota hotu ona, hein katak iha tempu ida ne’e bele rezolve daudaun ona”, espera Hugo Fernandes.

Nia hatutan, responsabilidade atu implementa ba rekomendasaun hirak ne’e kompeténsia ministériu sira no sentru Chega nia kna’ar maka halo monitorizasaun atu oinsá maka bele halo kooperasaun ba implementasaun rekomendasaun sira.

Rezolusaun ba  CAVR tuir artigu 160 Konstituisaun Repúblika Demokrátika Timor-Leste (RDTL, ko’alia kona-ba krime grave ne’ebé komete entre loron 25, Abril 19974 no loron 25, Outubru 1999, tenke responsabiliza ba prosedimentu kriminál sira iha tribunal nasionál no internasionál. 

Nune’e mós rezolusaun ba CVA  iha pájina rua, pontu 5, alínea 2, ko’alia kona-ba Kria programa reparasaun nasionál ida ne’ebé integradu ba vítima sira husi konflitu sira ne’ebé akontese ona iha Timor-Leste.

Jornalista: Zezito Silva

Editór: Francisco Simões

HUSIK IDA HATÁN