DILI, (TATOLI) – Ministru Defeza no Ministru Interiór Interinu, Filomeno da Paixão de Jesus, husu ba servisu migrasaun atu evita kobransa ilegál hasoru sidadaun rai li’ur bainhira destina iha Timor-Leste ho vistu turista hodi servisu, tanba la tuir lei hodi benefisia aan.
Nia afirma kazu kobransa ilegál durante ne’e akontese iha aeroportu internasionál Nicolau Lobato Dili no fronteira rai-maran Motain munisípiu Bobonaru.
“Keixa sira ne’e mai, balun eskritu no balun verbál no balun lori kedas video fó hatene katak ajente sira iha migrasaun ne’e liuliu iha Batugade no aeroportu Dili”, lamentasaun ne’e hato’o ba jornalista sira liuhosi konferénsia imprensa ne’ebé hala’o iha edifísiu ministériu defeza, Fatuhada, ohin.
Paixão relata hosi keixa ne’e balun rejista kobransa ilegál ho valór $200 ba sidadaun estranjeiru ne’ebé uza vistu turista hodi servisu iha rai laran.
“Demais ona, ida ne’e tenke remata, ha’u bolu diretór jerál migrasaun ne’e kuaze dala tolu ona para atensaun hodi akaba ona buat ne’e iha Timor”, tenik tan.
Atu evita hahalok ilegál ne’e, Ministru delega mós ekipa mista ida hosi ministériu hodi identifika kazu ne’e akontese ka lae, maibé to’o oras ne’e seidauk iha mudansa.
Dalan ida atu kombate hahalok ne’e maka, ohin Governante apela ba sidadaun rai li’ur atu kontaktu direta ba númeru telefone 78326687 ka 77172992 bainhira hetan kobransa hosi ajente servisu migrasaun sira iha futuru.
“Mai fó hatene ba ha’u liuhosi númeru kontaktu rua ne’e para ha’u atu buka sira”, nia hatete. “Ha’u haruka ekipa mista ba revista tun sae maibé fila mai sasán ne’e nafatin de’it, ne’ebé ha’u foin hanoin kona iha migrasaun nia laran maka la loos to’o ninia diretór jerál mós keta la loos karik”.
Bainhira laiha mudansa, governante ne’e sei foti asaun ida maka halo reforma ba instituisaun ne’e.
Tuir nia númeru sidadaun estranjeiru aumenta hodi servisu ho ilegál iha rai laran tanba hetan protesaun hosi servidór Estadu hirak ne’e.
Jornalista: Agapito dos Santos
Editora: Rita Almeida