MCCTL Sei Submete Prioridade Ba MCC Atu Apoia Orsamentu

0
117
Constâncio da Conceição Pinto.

DILI, (TATOLI) – Diretór Ezekutivu Millennium Challenge Corporation iha Timor-Leste (MCCTL), Constâncio Pinto, hafoin hasoru malu ho Primeiru Ministru, Taur Matan Ruak, ohin dehan programa prioridade hosi Compact Development Team (CDT) sei submete ba Millennium Challenge Corporation (MCC) atu tau orsamentu.

Eis Embaixadór, Constâncio Pinto, hatutan: “Prosesu definisaun projetu, daudaun ne’e seidauk define loloos, maibé tempu badak sei fó sai prioridade, maske nune’e eis diplomata ne’e subliña kona-ba água, saneamentu, kapasitasaun no oinsá atu kria ambiente ne’ebé di’ak kona-ba rezolusaun konflitu ne’ebé involve negósiu”.

MCC ne’e ajénsia Estadu Naklibur Amérika (EUA-sigla inglés) nian. Inisiativa ida ne’e di’ak liu no importante tebes ba ita nia relasaun diplomátika bilaterál entre Timor-Leste ho EUA.

MCCI hanesan reprezentante governu nian hala’o koordenasaun loroloron ho MCC kona-ba apoiu ne’ebé maka fó mai Timor-Leste. Tanba ne’e Xefe Governu, Taur Matan Ruak, enkoraja ami atu servisu maka’as liután no asegura servisu hotu.

Nune’e, Governu Timor-Leste servisu hamutuk ho MCC inklui parseiru dezenvolvimentu seluk hanesan Banku Mundiál no ADB hodi mantein nafatin relasaun ne’ebé maka iha ona.

Entretantu, reprezentante MCC Timor-Leste ne’ebé hasoru malu ho Primeiru Ministru, Taur Matan Ruak, maka hanesan Ministru Reforma Lejizlativa no Asuntu Parlamentár, Fidelis Leite Magalhães, Diretór Ezekutivu, Constâncio Pinto, Vise Diretór, Mariano.

Jornalista: Zezito Silva

Editora: Rita Almeida

HUSIK IDA HATÁN