ME La Muda Lei Zero Toleránsia Ba Violénsia

0
102

VIKEKE, (TATOLI) – Ministra Edukasaun, Juventude no Desportu, Dulce de Jesus Soares, hateten Ministériu Edukasaun (ME) sei la muda Lei Zero Toleránsia ba Violénsia iha eskola sira.

Nia esplika laiha baze legál ida atu Ministériu Edukasaun aplika violénsia iha eskola tanba Timor-Leste adopta zero toleránsia ba violénsia.

“Ha’u nia prezensa hanesan Ministra Edukasaun simplesmente atu kontinua no tau iha prátika katak iha Timor-Leste ita la permiti atu kontinua violénsia hahú hosi uma laran kedas”, dehan nia liuhusi programa diálogu entre komunidade no Prezidente Repúblika, Francisco Guterres Lú Olo, iha edifísiu Administrasaun Munisípiu Vikeke, Biloi, Munisípiu Vikeke, sesta (26/4), relasiona ona komunidade preokupa ba asaun profesór sira baku estudante iha eskola sira.

Nia haktuir dezde sai vise ministra edukasaun iha tempu liu-ba, nia enfrenta problema barak entre profesór ho estudante no inan-aman barak mai hato’o keixa ba Ministériu Edukasaun kuandu profesór sira baku estudante.

Tanba ne’e, governante ne’e dehan ba futuru ME kontinua fó formasaun ba profesór sira atu aplika disiplina pozitiva iha sala aula atu eduka estudante sira.

Dulce esplika tuir Dekretu Governu ba Disiplina Profesór fó dalan atu tau disiplina ba profesór sira, tanba profesór iha nia matenek oinsá atu jere sala aula.

“Bainhira profesór sira hatene metodolojia ensiñu no pedagojia ensiñu, automátikamente nia hatene jere sala aula lahó baku estudante”, Dulce tenik.

Jornalista: Xisto Freitas

Editora: Rita Almeida

HUSIK IDA HATÁN