Indemnizasaun, Afeta ba Progresu Ezekusaun Projetu Estrada

0
170
Ministru Obra Públika, Salvador Soares dos Reis Pires. Imajen/António Gonçalves

DILI, (TATOLI) – Progresu ezekusaun fíziku ba projetu estrada sira ne’ebé utiliza osan empréstimu atraza uitoan tanba afeta husi problema oi-oin, liuliu problema administrativa no indemnizasaun (kompensasaun).

Liuhusi audiénsia públiku entre Ministériu Obras Públika (MOP), Ministériu Planeamentu no Investimentu Estratéjiku (MPIE)  no mós Ajénsia Dezenvolvimentu Nasionál (ADN) ho Komisaun C Parlamentu Nasionál, ohin, Ministru Salvador Eugénio Soares dos Reis Pires, friza katak, tanba saida mak trosu hanesan Dili-Manatutu-Baukau tarde, tanba kestaun oioin, liu-liu administrativa no indemnizasaun ba eis propriesaun ba rai.

Ministru Salvador Pires klarifika ba membru Komisaun C ne’ebé trata asuntu Finansa Públika no Komisaun E ne’ebé trata asuntu Infraestrutura, katak kestaun administrativa no indemnizasaun mak hanesan fatór ne’ebé kontribui ba atrazu husi projetu.

Projetu husi fundu impréstimu ne’ebé la’o tarde mak hanesan projetu reabilitasaun estrada nasionál Dili-Manatuto-Baukau.

Finansiamentu ba projetu reabilitasaun estrada ne’e husi Orsamentu Jerál Estadu 2019 no mós husi fundu ne’ebé Governu Timor-Leste impresta husi Governu Japaun liuhusi Ajénsia Japaun nian ba Kooperasaun Internasionál (JICA).

Nune’e, obra reabilitasaun ne’e fahe ba trosu rua, ida uluk maka husi Dili ba Manatutu, konstrusaun hahú iha loron 30 jullu 2016, iha Hera (Dili) no ramata iha loron 25 abríl tinan 2019, iha ponte Lakló (Manatutu) ho nia naruk maka kilómetru 48,74.

Empreza ne’ebé kaer obra ne’e maka Sinohydro Corporation Limited husi Xina ho kustu totál milliaun $48,87.

Trosu daruak mak husi Manatutu ba Baukau, sei hahú iha loron 18 agostu 2016, iha Lakló (Manatutu) no sei remata iha loron 14 maiu 2019, iha munisípiu Baukau.

Trosu ne’e ho distánsia kilómetru 57,702 no Empreza ne’ebé kaer obra ne’e maka Shanghai Construction (Group) General Co., Ltd. husi Xina ho kustu totál ba obra ne’e mak milliaun $59,55.

Jornalista: Julia Chatarina

Editór: Francisco Simões

HUSIK IDA HATÁN