LAUTEIN, (TATOLI) – Sekretáriu Estadu Komunikasaun Sosiál (SEKOMS), Merício Juvenal dos Reis Akara, hatete governu da-ualu ne’ebé lidera hosi Primeiru-Ministru, Taur Matan Ruak, orienta ona ministériu relevante atu konstrui portu multifunsaun iha zona leste inkluzivamente Loré, tuir kompromísu polítika durante kampaña.
“Lospalos liuliu Loré poténsia ba turista, entaun iha infraestrutura balun ita sei tau propriedade, iha mós hanoin atu konstrui portu multifunsaun. Signifika militár no sivíl bele uza portu ne’e”, katak membru governu ne’e ba jornalista sira iha munisípiu Lautein, postu administrativu Lospalos, sábadu (13/4).
Nia akresenta: “Ita-nia primeiru-ministru hanoin prosesu ne’e bele la’o, tanba hanoin ida ne’e importante mai parte leste para kontrola mós ita-nia tasi mai parte leste ne’e di’ak liu, bele fasilita transporte tasi nian”.
Merício Akara katak tan kompromisu sira ne’e iha nível polítika orienta ona. “Entaun, kestaun operasionál kada ministériu relevante mak sei haree teknikamente iha aspetu lei to’o implementasaun akontese”.
Governante ne’e mós haktuir Governu Konstitusionál da-ualu nia polítika, prioridade, liuliu ba munísipiu Lautein, tuir kompromisu polítika atu bele dezenvolve Loré, no Laivai sai postu administrativu foun.
“Primeiru-ministru orienta ona Ministériu Estatál para hahú haree aspetu legál para prosesa”, afirma.
Munisípiu Lautein dadaun ne’e iha postu administrativu Lospalos vila, Lautein, Luro, Tutuala, Iliomar no Moru.
Entretantu, Sekretáriu Estadu dehan mós Governu da-ualu komprometidu atu ezekuta programa iha aspetu edukasaun, saúde, infraestrutura no selseluk tan.
Jornalista: Rafy Belo
Editora: Rita Almeida
