Sekretáriu Estadu ba Formasaun Profisionál no Empregu Julião da Silva, Imajen/Egas Cristovão

DILI, 30 abr 2019 (TATOLI) – Sekretáriu Estadu Formasaun Profisionál no Empregu (SEFOPE), Julião da Silva, kongratula traballadór timoroan iha nasionál no internasionál, tanba ho sira-nia partisipasaun iha dezenvolvimentu ekonomia importante.

“Hakarak agradese ba maluk traballadór tomak ne’ebé iha rai-laran no li’ur, Austrália, Koreia, Irlanda, Inglaterra no mós nasaun seluk ne’ebé ami labele temi”, Julião afirma iha ámbitu komemorasaun loron mundiál traballadór sira-nian ho tópiku “1 de maio, promove a justiça social, protege e garante o serviço digno á todos os trabalhadores em Timor-Leste”, au mezmu tempu selebra mós ezisténsia International Labour Organization (ILO) da-100 iha mundu no prezensa ILO iha Timor-Leste ba 16 iha Delta Nova, ohin.

Nia dehan iha relatóriu estatístika hatudu kontribuisaun remittance traballadór sira iha segundu lugar depois de Fundu Petróleu. Tanba ne’e sei serbisu maka’as hodi sai primeiru lugar iha futuru mai, maibé tentativa hirak ne’e atu atinje, Governu liuhusi SEFOPE kontinua esforsu atu kria polítika hodi garante kualidade ba formasaun profisionál mão de obra (badaen).

“Maibé ida ne’e de’it sei la sufisiente bainhira laiha partisipasaun no kontribuisaun husi setór privadu. Ami hakarak demonstra ami-nia agradese ba setór privadu iha rai-laran no li’ur ne’ebé fó ona oportunidade ba timoroan sira hodi hetan serbisu. Espera katak empregadór no traballadór sira hotu sei sai parseiru ida ne’ebé di’ak iha serbisu fatin”.

Iha loron boot serbisu-na’in sira-nian, Julião da Silva, husu ba traballadór atu koopera nafatin ho empregadór sira no hatudu vontade di’ak, serbisu nafatin no labele ezije boot liu tanba bainhira serbisu di’ak no iha abilidade di’ak maka loron ida sei simu liu fali buat ne’ebé sira oferese ona.

Prezidente Kámara Komérsiu Indústria Timor-Leste (CCI-TL), Óscar Lima, kongratula loron mundiál traballadór liuliu ba timoroan.

“Orgullu tanba ami reprezenta setór privadu nasionál fó parabéns, traballadór ami-nia parseiru, sindikatu traballadór ami-nia parseiru no Governu Timor-Leste ami-nia parseiru. Tolu ne’e oinsá buka no fó serbisu ba ida-idak nian serbisu-na’in”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here