Primeiru-Ministru, Taur Matan Ruak. Imajen Antonio Goncalves

DILI, 30 abr 2019 (TATOLI) – Primeiru-Ministru, Taur Matan Ruak, konsidera traballadór sira nu’udar eroi foun iha faze dezenvolvimentu nasionál.

“Liuhusi sira mak ita harii Nasaun ida-ne’ebé Forte, Riku no Seguru!”, afirma Xefe Governu liuhosi ninia mensajen hodi rekoñese no valoriza knaar traballadór sira-nian iha sosiedade, ba loron mundiál traballadór ne’ebé sei komemora aban, (1/5/2019).

Liuhosi lia-menon ne’e, Xefe Ezekutivu dehan loron traballadór nian la’ós de’it deskansa nian, maibé nu’udar biban ne’ebé di’ak tebetebes atu hahí empeñu, méritu, dixiplina, profisionalizmu, serbisu iha ekipa.

Nia hatutan espíritu sakrifísiu no kumprimentu devér nian ne’ebé horik nafatin iha traballadór sira, tantu nasionál nune’e mós estranjeiru sira, ne’ebé belar iha setór oioin husi ita-nia ekonomia no administrasaun públika, ne’ebé kontribui maka’as ba produtividade no atu ita-nia País hakat ba oin iha ritmu ne’ebé di’ak.

Traballadór, nia afirma nu’udar bénsaun no rikusoin loloos ida husi família, komunidade, empreza, instituisaun ka Nasaun ida, justu duni atu selebra ezemplu di’ak liu sira kona-ba serbisu no exelénsia, hanesan fonte enkorajamentu no inspirasaun nian hodi hasoru dezafiu sira husi dezenvolvimentu.

Ba traballadór timoroan no estranjeiru hotu-hotu, hatutan iha lia-menon ne’e husu atu kontribui ho laran tomak ba Timor-Leste ida-ne’ebé modernu, dezenvolvidu no prósperu liután.

“Ha’u hakarak tebes, hodi ha’u rasik nia naran no lori Governu nia naran, hato’o ami-nia agradesimentu ne’ebé boot tebetebes”, hatutan Primeiru-Ministru iha lia-menon ne’ebé TATOLI asesu liuhosi portál www.gpm.gov.tl.

Loron hanesan, komunidade Katólika mós selebra loron Saun José Operáriu nian.

Edisaun: Rita Almeida

HAKEREK NO HATÁN

Please enter your comment!
Please enter your name here