DILI, 30 abr 2019 (TATOLI)-Embaixadór Nova Zelándia foun, Phil Hewitt mak troka hikas Embaixadóra sesante Vicki Poole, hodi hala’o misaun diplomata Estadu Repúblika Nova Zelándia nian iha Timor-Leste.
Embaixadór Phil Hewitt sei to’o iha Dili, Timor-Leste, iha loron 7 Maiu 2019, hodi hala’o knar diplomata nian tanba Embaixadóra Vicki Poole termina ona ninia mandatu iha nasaun ne’e.
“Ha’u sei fila fali mai iha Timor-Leste iha tinan rua ka tolu mai tanba gosta haree dezenvolvimentu estrada, eskola, agrikultura, peska iha futuru ida di’ak liu”, hateten Embaixadóra sesante Nova Zelándia mai Timor-Leste, Vicki Poole ba jornalista sira bainhira despede Primeiru-Ministru, Taur Matan Ruak, ohin, iha Palásiu Governu.
Embaixadór foun ne’ebé atu troka, diplomata ne’e espera sei kolabora no servisu hamutuk ho governu di’ak liu tan hodi apoiu dezenvolvimentu Timor-Leste nian.
“Nia tenke halo viajen iha Timor-Leste, liuliu Jaco, Oe-cuse, Suai, Viqueque tanba Timor-Leste nu’udar illa ida bonita hodi koñese di’ak kona-ba Timor-Leste”, hateten Vicki Poole.
Jornalista: Agapito dos Santos
Editór: Francisco Simões
