Diretór Ezekutivu HNGV, Aniceto Barreto. Imajen António Goncalves

DILI, 30 abr 2019 (TATOLI)-Loron hirak ikus ne’e, media sosiál Facebook virál ho pasiente ida ne’ebé hasan de’it iha kabaas tanba  konsidera la iha kadeira roda atu tula.

Pasiente Liliana ne’ebé nia aman hasan iha kabaas hodi lori sai obrigatoriu hosi HNGV. Imajen/facebook

Ho imajen  ne’ebé ema publika virál iha Facebook halo ema ua’in kondena Governu da-ualu, liu-liu Ministériu Saúde ho Dirijente sira iha Ospitál Nasionál Guido Valadares (HNGV-sigla portugés). Ho nune’e, Diretór Ezekutivu HNGV,  Aniceto Cardoso Barreto, halo klarifikasaun hodi dehan, HNGV iha ekipamentu kadeira roda sufisiente atu tula pasiente sira atu halo tratamentu saúde bainhira iha kondisaun fíziku grave.

Aniceto Cardoso Barreto esplika katak, imajen ne’ebé virál iha Facebook ne’e refleta ba kondisaun pasiente Liliana Tilman (tinan 16) ne’ebé baixa HNGV iha loron 28 Abril, tuku 17:45 lokraik tanba moras infeksaun pulmaun. Ho kondisaun moras hela, maibé família pasiente husu obrigatóriu ba HNGV atu alta hodi fila ba uma iha loron 29 April, foin lalais ne’e,  maske  seidauk rekupera.

“Ita nia enfermeiru sira sei prepara hela fatin, karta ne’ebé sira obriga atu sai obrigatóriu, ita sei prepara hela prosesu administrasaun, maibé derrepente de’it, pasiente  nia aman ko’us ona nia oan lori sai. Nune’e, ema balun publika iha rede sosiál dehan fali kadeira la iha”, Aniceto Cardoso Barreto halo klarifikasaun ba jornalista sira, ohin, iha Palásiu Governu.

HNGV iha kadeira roda purvolta 35 ne’ebé koloka  ba kada unidade  hamutuk 3 tanba sosa  ona iha tinan 2017 no 2018.

“Laiha informasaun ida serteza katak iha ospitál laiha kadeira roda, maibé ita iha kadeira sufisiente atu atende ita nia pasiente sira ne’ebé labele lao iha mós kama ne’ebé bele uza hodi tula moras sira”, tenik Aniceto Barreto.

Razaun hosi asaun aman ne’e tanba iha karreta taxi hein ona iha área ospitál atu tula pasiente fila ba uma, tanba ne’e, pasiente nia  aman foti desizaun hodi hasan de’it (kateu) pasiente hodi tula iha taxi.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here