Primeiru-Ministru, Taur Matan Ruak, prezide reuniaun Konsellu Ministru iha Palásiu Governu. Imajen/Egas Cristóvão

DILI, 30 abr 2019 (TATOLI) – Governu liuhosi desizaun Konsellu Ministru, ohin, hadi’a no aprova ona Proposta Rezolusaun Governu ne’ebé aprezenta hosi Primeiru-Ministru, Taur Matan Ruak,  kona-ba Promosaun Pesoál Integradu iha Karreira Rejime Jerál Administrasaun Públika.

“Primeiru-Ministru aprezenta Proposta Rezolusaun Governu ida hodi permite promosaun pesoál integradu iha karreira rejime jerál Administrasaun Públika nian. Vaga tinan ne’e, atu halo promosaun hosi inisiativa Komisaun Funsaun Públika (CFP-siglaportugés)”, informa Ministru Estadu no Prezidénsia Konsellu Ministru, Hermenegildo Augusto Pereira ba jornalista sira iha Palásiu Governu.

Ministru Agio Pereira esplika, vaga ne’e rasik realiza tinan-tinan husi Governu, liuhosi proposta CFP ne’ebé ninia limite to’o porsentu 10 husi total ema ba kada kategoria ou grupu karreira professional.

Antes ne’e, Prezidente CFP, Faustino Cardoso ho ekipa aprezenta ba Xefe Governu kona-ba planu promosaun  grau ba funsionáriu públiku hamutuk 1.455 ne’ebé prienxe ona rekizitu hosi CFP hodi tuir promosaun iha tempu besik.

Biban ne’e  CFP aprezenta pedidu atu halo alterasaun ba definisaun vaga ba promosaun tanba artigu balun sentidu la klaru hodi hamosu interpretasaun diferensa entre gabinete Primeiru-Ministru ho CFP.

 Jornalista: Julia Chatarina

Editór: Francisco Simões

HAKEREK NO HATÁN

Please enter your comment!
Please enter your name here