Logotipu MCC

DILI, 30 abr 2019 (TATOLI) – Governu liuhosi desizaun Konsellu Ministru tersa ne’e aprova proposta deliberasaun ne’ebé aprezenta husi Ministru Reforma Lejislativa no Asuntu Parlamentár, Fidelis Leite Magalhães, ho ninia ekipa.

Ministru Estadu no Prezidénsia Konselhu Ministru, Agio Pereira, hatete proposta ne’e kona-ba akordu konsesaun no impementasaun entre Millennium Challenge Coorperation (MCC) ho Governu Timor-Leste ba implementasaun Millennium Challenge Compact.

“Reuniaun Konsellu Ministru ohin aprova proposta deliberasaun husi Ministru Reforma Lejislativa no Asuntu Parlamentár, Fidelis Leite Magalhães, hodi asina MCC. Nune’e, ministru simu poder tomak husi Konsellu Ministru hodi tulun, avansa ho prosesau ne’e”, tenik iha Palásiu Governu, hafoin enkontru.

Nia haktuir akordu ne’ebé Ministru Fidelis asina hodi simu grant milliaun $7,350 hodi Timor-Leste hahú prosesu implementasaun.

Antes ne’e Konsellu Ministru fó ona kompeténsia ba MRLAP hodi asina akordu ne’ebé MCC fó ho valor $650.000 hodi hahú prosesu preparatóriu.

MCC no Governu Timor-Leste servisu hamutuk iha dezenvolvimentu programa kompaktu durante tinan lima atu bele hamenus kiak liuhosi kreximentu ekonómiku no haree liu ba prinsípiu dezafíu sira ne’ebé mak Nasaun hasoru, hanesan asesu ba bee moos, saúde, nutrisaun, saneamentu no dezenvolvimentu rekursu umanu.

Programa kompaktu MCC ba nasaun selesionada sira ne’ebé tuir kritériu rigorozu elijibilidade MCC nian.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here