Pontu Vógál ODS-UPMA António Vìtor,Imajen/Egas Cristovão

DILI, 29 Abr 2019 (TATOLI)-Timor-Leste sei aprezenta mensajen xave hamutuk 11 ne’ebé maka aliña ho programa Governu nian no sei hato’o iha liafuan 700 iha Forum Polítiku Altu Nivel Nasaun Unida iha 17 jullu, tinan ne’e.

Pontu vogál Objetivu Dezenvolvimentu Sustentavel (ODS) Unidade Planeamentu, Monitorizasaun no Avaliasaun (UPMA), António Vítor, informa, iha mensajen dahuluk ne’e kona-ba Timor-Leste hanesan nasaun ida ne’ebé foun iha mundu liuliu iha Ázia nia laran, maibé iha kompromisu maka’as hanesan baze dezenvolvimentu ne’e maka komesa ho rekonsiliasaun, foin sai husi postu konflitu.

”Ita iha problema ho ita-nia viziñu Indonézia, ita halo rekonsiliasaun, maibé durante ne’e, iha mensajen importante kona-ba rekonsiliasaun, inkluzaun ho demokrasia. Ita haree katak demokrasia buat hotu la’o di’ak, maibé baze loloos ne’e mak rekonsiliasaun ne’ebé fó fatin tanba laiha preokupasaun ho intervensaun husi li’ur, nune’e aléinde ita di’ak malu ho ita-nia viziñu, ita mós haree iha rai-laran ita iha orsamentu ba ema sira ne’ebé uluk partisipa hodi kontribui ba libertasaun nasionál, ita haree inan-faluk, oan-ki’ak sira ne’ebé Governu fó atensaun. Prosesu rua ne’e la’o hamutuk, maibé iha laran ne’e iha mós demokrasia ne’ebé forte”, António Vítor afirma, ohin, iha nia servisu fatin, iha área Palásiu Governu.

Iha mensajen xave daruak ko’alia kona-ba Objetivu Dezenvolvimentu Sustentavel (ODS) ne’e rasik. Iha mundu nasaun barak maka adota, maibé Timor-Leste liuliu ODS 16 (Pás, Justisa no Instituisaun Efikás) sai kampiaun ka pioneiru hamutuk ho nasaun sira seluk hodi inklui ODS 16 no haree katak se laiha pás, justisa, maka dezenvolvimentu ne’e sei enfrenta problema oioin.

“Ida ne’e maka dudu ODS 16 ne’e tama, signifika Timór sai kampiaun, sai nasaun ida ne’ebé fó advokasia maka’as no haree ba estabelesimentu G7+ nian atu haree asuntu kona-ba pás, justisa ho instituisaun ida forte”, hateten António Vítor.

Mensajen datoluk nian, nia esplika, haree asuntu importante liu mak rekonsiliasaun no inkluzaun ho Indonézia sai hanesan prioridade ida imediata depois ukun-an, Timor-Leste nia lider nasionál sira preokupa ho asuntu ida ne’e.

Ida ne’e sai hanesan lisaun ida ba nasaun barak tanba depois ukun-an, país barak la konsege hetan ida ne’e no Timor-Leste hakarak fahe mensajen ne’e ba mundu katak Timór hahú ho dalan ne’ebé di’ak no iha prosesu inkluzaun nian ema hotu tenke hetan benefísiu, tenke partisipa ativa iha prosesu dezenvolvimentu mós importante no Estadu halo buat barak ona.

Mensajen seluk, António Vítor hatutan, konsolidasaun demokrasia depois Timor-Leste restaura nia independénsia. Iha ne’e ko’alia kona-ba direitu ema nian, instituisaun sira ne’ebé presiza iha fatin para asegura katak nasaun ne’e demokrátika duni hanesan estabelese Komisaun Anti Korrupsaun, iha instituisaun ba eleisaun nian ne’ebé independente.

“Ne’e importante tebes para ita atu komunika ba mundu katak progresu sira ne’e la’o hanesan ne’e no ita sei kontinua haberan ita-nia instituisaun sira, ita haree ho programa reformasaun ne’ebé Governu sira liu ba no agora sei hala’o nafatin no tenke reforsa tan área justisa ne’ebé di’ak liu, hanesan ne’e ita bele konsolida pás hodi promove role of raw hanesan Estadu direitu”, tenik António.

Nia dehan, mensajen sira ne’e bele refleta mai fali Timor-Leste bainhira hato’o iha forum internasionál, signifika Timor-Leste iha kompromisu atu hala’o ODS ne’e para prosesu iha rai-laran hanesan polítika sira Governu nian, programa dezenvolvimentu tenke koerente tuir saida maka hatete iha mensajen sira ne’ebé fó sai.

Iha mensajen dalimak sei hato’o katak Timór hanesan país joven ne’ebé iha sentidu rua mak foin independente ho nia populasaun foin-sa’e barak liu, no mós iha setór privadu ne’ebé hahú buras. Hanesan país ne’ebé foin-sa’e loloos nia forsa produtivu barak, maibé haree husi aspetu seluk liuliu ba setór privadu, ekonomia sei dependente ba despeza públika, entaun seidauk bele kria postu serbisu ne’ebé boot, nune’e kestaun sira ne’ebé iha, mensajen ne’e husu rekomendasaun para tenke iha investimentu maka’as liu iha área edukasaun atu hasa’e koñesimentu, abilidade téknika bainhira iha investimentu iha área ekonomia nian ema sira ne’e ba serbisu bele kualifikada no hetan oportunidade di’ak.

Iha mensajen tuir mai sei hato’o sobre progresu sira ne’ebé hala’o iha área saúde nian no ida ne’e importante tebes tanba kontribui oinsá maka Timor-Leste investe iha nia kapitál umanu. Iha ne’e Timór hetan avansu ne’ebé di’ak iha taxa mortalidade inan no oan nian hahú redús, livre polio no iha dalan di’ak atu kore aan husi malária.

“Maibé ita sei iha problema ho defisiénsia nia asesu ba edukasaun, saúde sei limitadu hela. Hanesan prinsípiu importante iha ODS nian labele husik ema ida iha kotuk, ita labele husik grupu ida no ida ne’e maka ita fó atensaun”.

Iha igualdade feto no mane iha área servisu nian sei anota hela no presiza mellora iha nivel edukasaun sekundáriu no ensinu superiór no ida ne’e mensajen ne’ebé liga ho kapitál umanu nian.

“Iha númeru hitu ita ko’alia kona-ba má nutrisaun, sai isu boot no seguransa alimentár ita sei enfrenta hela difikuldade, maibé nia ligadu ho infraestrutura aléinde ne’e alimentasaun, saúde, maibé liuliu ba bee-moos, ne’e investimentu presiza hasa’e tan”, António esplika.

Iha mensajen daualuk, nia lia tun tan, ko’alia sobre jéneru nian. Iha Timór iha númeru reprezentasaun ne’ebé di’ak ba feto sira iha Parlamentu no mós feto sira ne’ebé iha pozisaun ba foti desizaun iha Governu no setór privadu.

Nia hateten, mezmu feto nia reprezentasaun di’ak kompara tinan sira uluk, maibé sei enfrenta nafatin problema feto asesu ba justisa no buat barak ne’ebé presiza hadi’a.

“Iha númeru sia, ita ko’alia kona-ba mensajen ida ne’ebé ita hakarak hato’o ba nasaun seluk katak ita iha Fundu Petróleu. Ba ita oinsá ita hakarak uza ba ita-nia nesesidade dezenvolvimentu agora, maibé ita bele rai mós balu ou investe iha área sira ne’ebé aban-bainrua bele halo fali osan para oan no bei-oan sira uza fali”.

Sei hato’o mós katak uza rekursu ne’e barak liu halo investimentu ba infraestrutura iha tinan-tinan boot nafatin, maibé ida ne’e kondisaun ne’ebé tenke investe para futuru bele fó retornu ekonómiku no bele uza fundu ne’e, maibé ho kuidadu.

Iha mensajen seluk sei hato’o katak Timor-Leste hakarak atu reforsa tan nasaun sira ne’ebé sofre problema mudansa klimátika.

Ikus mak Timor-Leste iha hela faze konstrusaun Estadu sei kontinua, embora iha rekursu Mina-rai, maibé osan de’it lato’o no presiza iha parseria ne’ebé bele iha termu koñesimentu dezenvolvimentu, maibé koñesimentu iha kooperasaun iha nivel nasionál mak setór privadu no internasionál mak parseiru dezenvolvimentu, maibé nivel rejionál no globál presiza esplora oinsá maka bele haree parseria ida ne’ebé di’ak liu.

Tuir ajenda Timor-Leste sei aprezenta iha Nova Iorke iha loron 17 jullu loraik, ne’ebé maka sei hato’o relatóriu iha minutu 10 no minutu lima ba vídeo, restu ba sesaun ema husu.

Jornalista : Maria Auxiliadora

Editór: Francisco Simões

 

HAKEREK NO HATÁN

Please enter your comment!
Please enter your name here