Primeiru-Ministru, Taur Matan Ruak, akompaña husi Ministru Estadu Prezidénsia Konsellu Ministru, Hermenegildo Augusto Cabral Pereira, no Ministru Reforma Lejizlativa Asuntu Parlamentár, Fidelis Magalhães, hasai fotografia hamutuk ho reprezentante Sky Trans, Austrália CEO, Michael Thinne, ho nia delegasaun hafoin enkontru iha Palásiu Governu. Dili, 29 abril 2019. Imajen António Gonçalves

DILI, 29 abr 2019 (TATOLI) – Kompañia aviasaun SKY Trans hosi Queensland Austrália iha interese ajuda governu hodi harii kompañia aviasaun ba Estadu Timor-Leste hodi kompete mós ho kompañia aviasaun hosi rai li’ur.

Xefe Ezekutivu  SKY Trans, Michael Thinee, dehan interese ne’e ba jornalista sira bainhira relata planu kooperasaun ba Primeiru-Ministru, Taur Matan Ruak, iha Palásiu Governu, ohin.

“Enkontru ohin ho Primeiru-Ministru hodi ko’alia oinsá atu harii kompañia aviasaun Timor nian rasik, tanba negosiasaun ne’e parte rua halo ona durante tinan tolu ona (durante Governasaun da-neen) no ohin aprezenta fali projetu komersiál ne’e para oinsá atu halo parseria”, dehan nia.

Diskusaun ohin seidauk hetan desizaun ikus hosi Primeiru-Ministru, tanba sei halo estudu ba proposta ne’e no mós sei konsulta ho membru Governu da-ualu.

Akordu ne’e iha pakote hanesan treinamentu ba timoroan atu sai pilotu, mekánika inklui vou internasionál sira hanesan Bali, Singapura no Austrália, tanba ne’e presiza tempu atu kompleta prosesu negosiasaun ho nasaun seluk kona-ba lisensa vou.

“Se kazu governu Timor-Leste hola ona desizaun fulan 10, ita sei avansa ho parseria ida ne’e”, tenik tan.

Planu kooperasaun ne’e mai-hosi interese governasaun da-neen ne’ebé husu kompañia atu ajuda harii aviasaun iha nasaun ne’e.

Antes ne’e kompañia mai ho ninia pedidu atu husu lisensa komersiál atu Sky Trans bele halo operasaun entre Dili- Austrália hodi kompete ho Air North.

Entretantu, Sky Trans funda hosi David ho Sue Barnard iha outobru 1990  hanesan kompañia aéreu no hahú ninia operasaun iha 1993. Novembru 2000, kompañia  ne’e konsorsiu ho Air Swift Aviation.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here