Sekretariu Estadu Juventude no Desportu, Nélio Isaac Sarmento, ho Sekretariu Estadu Terras no Propriedade, Mario Ximenes. Imajen António Goncalves

DILI, 29 abr 2019 (TATOLI) – Sekretáriu Estadu Juventude no Desportu, Nélio Isaac Sarmento, hamutuk ho Sekretáriu Estadu Terras no Propriedade, Mário Ximenes, hasoru Primeiru-Ministru, Taur Matan Ruak, hodi troka informasaun no ideia kona-ba kriasaun kampu multifunsaun desportiva ne’ebé agora dadauk atu transforma ba abitasaun komunidade ne’ebé afetadu husi dezenvolvimentu programa Governu.

Sekretáriu Estadu Juventude no Desportu, Nélio Isaac Sarmento, hateten rai iha Bekora (eis 744 iha okupasaun Indonézia) identifika atu harii kampu futeból, sentru informasaun desportiva inklui hela fatin ba atleta sira bainhira Timor-Leste sai uma nain, maibé fatin ne’e agora atu sai harii abitasaun ba komunidade.

“Loloos ita iha ona faze preparasaun ba dezeñu ne’ebé porsentu 70 ona maibé iha parte seluk Estadu mós presiza atu dezenvolve abitasaun ba komunidade tuir programa governu nian”, tenik ba jornalista sira iha Palásiu Governu, segunda (29/4).

Nune’e, liuhosi enkontru ne’e Xefe Governu husu atu identifika fali fatin seluk hodi harii kampu multifunsaun desportiva ba atleta sira no biban hanesan Sekretáriu Estadu Juventude no Desportu, Nélio Isaac Sarmento, husu Xefe Governu nia apoiu.

Em nome Sekretaria Estadu Juventude no Desportu (SEJD) husu Primeiru-Ministru nia tulun no apoiu totál atu ita komesa avansa ho planu ne’ebé di’ak, liu-liu investimentu ba setór desportu ninia, kriasaun kampu, salaun desportiva, la’ós de’it ba Dili maibé ita abranje ba munisípiu”, katak.

Hodi dehan tan: “Ha’u dehan ba Primeiru-Ministru sei ida ne’e ami entrega ba Ministériu Obra Públika (MOP) atu halo abitasaun ba komunidade nia, entaun tulun ami SEJD atu dezenvolve no investe iha área desportiva, ba kondisaun fasilidade desportiva ne’ebé mak sei menus hela”.

Bainhira Sekretaria Estadu Terras no Propriedade (SETP) identifika ona rai ne’e, sei atribui fali ba MOP hodi komesa halo planu ba konstrusaun abitasaun ba komunidade.

Rai iha Bekora ne’ebé atu harii abitasaun ba komunidade, identifika ho medida hamutuk ektare 1,6.

Nune’e mós SEJD atu dinamiza Estádiu Munisipál Dili, tanba agora iha problema ho kontrusaun, nune’e mós identifika ona fatin balun ne’ebé atu tama ba programa SEJD hanesan Kampu Komoro, Kampu Alor, Kampu Bintang Bidau, no Kampu Vila-Verde.

“Ida ne’e tama iha programa SEJD atu dezenvolve fasilidade hirak ne’e no abranje ba munisípiu sira ba kampu multifunsaun, maibé dezenvolvimentu ne’e rasik faze pur faze”, katak.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here