Partidu CNRT, Sábadu (27/4/2019), selebra nia aniversariu ba da-12. Imajen/espesiál

DILI, 29 abr 2019 (TATOLI) – Sekretáriu Jerál Partidu CNRT, Francisco Kalbuadi Lay, afirma katak, iha tempu badak nia laran, lider Aliansa Mudansa ba Progresu (AMP) sei tur hamutuk  atu buka dalan hodi ultrapasa inserteza ba kandidatu membru governu na’in  sia (9) ne’ebé pendente hela.

Sekretáriu Jerál PD, Antonio da Conçeicão participa iha serimônia aniversariu partidu CNRT ba da-12, Sábadu (27/4/2019). Imajen/espesiál

Liuhosi aniversáriu partidu Kongresu Nasionál Rekonstrusaun Timorense (CNRT-sigla Portugés) ba da-12, Sábadu (27/4/2019) iha Sede Nasionál CNRT, Bairru dos Grilos, Dili,  Francisco Kalbuadi Lay, haktuir mensajen Prezidente CNRT, Kay Rala Xanana Gusmão nian, ne’ebé husu atu kuadru ho militante hotu atu halo reflesaun.

Francisco Kalbuadi Lay hateten, tempu badak lider AMP, hanesan Xanana Gusmão, Taur Matan Ruak no Naimori Bucar, bele tur hamutuk konsolida malu oinsá buka dalan atu haree inserteza ba lista membru governu pendente.

Prezidente Partidu CNRT, Kay Rala Xanana Gusmão liuhosi nia mensajen iha aniversáriu partidu CNRT,  hateten, partidu CNRT tenke hadi’a an rasik liuhosi halo reflesaun, tenke komprende nia lisaun sira, labele fiar ba organizasaun seluk ka ema ruma.

“Karik situasaun maka nune’e, tuir ha’u nia hanoin, partidu tenke konsidera daudaun ona hodi diskute kle’an kona-ba futuru partidu nian”, afirma Xanana Gusmão.

Xanana hatutan, tinan tolu tan partidu CNRT sei halo kongresu. Maibé atu halo konferénsia estraordináriu iha kualkér tempu de’it, bele semana oin, bele fulan oin no bele tinan oin hodi hasai desizaun estratéjiku.

Nia mensiona katak, se partidu CNRT hakiak de’it korruptór, se de’it maka pertense ba CNRT ka servisu ba partidu ne’e konsidera korruptu, se nune’e partidu hanoin dau-daun ona, se presiza atu salva nasaun di’ak liu taka partidu CNRT ka disolve partidu ne’e.

Kestaun ne’e maka sai hanesan dezafiu boot ba partidu no Xanana husu ba partidu nia ema hotu atu ulun malirin. Se hakarak konsolida partidu tenke hahú prátika krítiku no auto krítiku, onestu no franka iha partidu laran.

Prezidente Partidu CNRT hakarak hato’o hanoin katak antes atu kata ka disolve partidu CNRT,  hotu-hotu tenke buka despede kedan iha família, tanba la kleur de’it kuadru partidu ida-idak  ba simu sentensa iha tribunál atu bele fó valór ba justisa, justisa ne’ebé hatama ona ema CNRT nian barak iha kadeia.

Xanana mós afirma katak, CNRT nia ema ida la tur iha Estadu nia leten. Los maibé hatudu uluk ema nia sala, nia sala saida. Ida ne’e maka dehan demokrasia no transparénsia.

Marka mós prezensa  iha serimónia aniversáriu partidu CNRT ne’e,  Sekretáriu Jerál Partidu Demokrátiku (PD), Antonio da Conçencão “Kalohan”,  prezidente partidu UDT, Gilman dos Santos, kuadru sira husi Partidu Libertasaun Populár (PLP) no KHUNTO, ho mós konvidadu importante sira seluk.

 Jornalista: Zezito Silva

Editór: Francisco Simões

HAKEREK NO HATÁN

Please enter your comment!
Please enter your name here