DILI, 29 abr 2019 (TATOLI) – Prezidente Parlamentu Nasionál (PPN), Arão Noe de Jesus Amaral, la bele halo ajenda iha plenária ba debate relatóriu Komisaun Inkéritu Parlamentár (KIP) tanba relatóriu ne’e rasik la-aprova iha nivel komisaun.
“Kona-ba ba relatóriu KIP, ha’u labele lori aprezenta iha plenária ba relatóriu ne’ebé mak la-aprovadu iha nivel komisaun”, esklarese Prezidente PN, Arão Noe de Jesus Amaral, ohin, liuhosi plenária PN.
Nia admite katak bainhira relatóriu ne’e aprova iha komisaun, maka iha loron 30 nia laran, bele lori mai ajenda plenária, maibé tanba la-aprova, maka labele ajenda.
Tuir nia, problema ne’e la’ós akontese ba iha relatóriu KIP de’it, maibé ba komisaun eventual, komisaun espesializada sira bainhira relatóriu mak la-aprova ona iha komisaun, labele submete ba plenária, tanba ne’e mak kada relatóriu paresér sempre sita relatóriu ne’e aprovadu ho votu hira hodi iha dalan ajenda iha plenária.
PPN mós informa, iha paresér téknika ne’ebé fahe ona ba kada deputadu sira hodi iha koñesimentu no iha nota ne’e iha ona informasaun klaru kona-ba KIP ajenda ou la’e ba plenária.
“Se deputadu sira la-konkorda, ha’u mós lahatene tanbasá la-aprova iha nivel komisaun, ida ne’e la’ós kompeténsia meza ninian”, hateten prezidente PN.
Membru PN hosi Bankada FRETILÍN, Antoninho Bianco, ne’ebé hanesan mós Prezidente KIP hateten, nia parte analiza ona nota téknika no konsidera meza lakohi ajenda tanba ne’e viola prinsípiu boa governasaun.
“Se viola prinsípiu boa governasaun, Governu ne’e atu halo saida? Parlamentu atu asegura boa governasaun ka atu taka asuntu sira ne’e hotu. Prezidente kontra ona konsiénsia hodi halo buat ne’ebé la tuir konsiénsia”, hateten Deputadu Antoninho Bianco.
Xefe Bankada FRETILÍN, Aniceto Longunhos Guterres Lopez, mós konsidera bainhira iha hanoin la-aprova mak la lori ba plenária, interpretasaun bele oin-oin.
“Forma Komisaun Inkéritu ne’e, liuhosi ita bot (PPN) nia despaxu rasik, to’o ikus la-hetan aprovasaun PPN tenke buka hatene tanba saida mak la hetan aprovasaun iha komisaun no buka esklarese”, tenik Deputadu Aniceto Guterres.
Hodi konsidera problema nia abut mak la-aprova relatóriu iha bankada tamba membru KIP husi AMP halo boikote. “Parlamentu tenke responsabiliza ninia aktu ba públiku liuhosi plenária, tanba saida?”, reforsa Aniceto Guterres.
Jornalista: Julia Chatarina
Editór: Francisco Simões
Le mos: http://www.tatoli.tl/2019/03/kip-konklui-ona-servisu-ho-rekomendasaun-31/
http://www.tatoli.tl/2019/04/relatoriu-kip-seidauk-lori-ba-plenaria-pn/
