Primeiru-Ministru, Taur Matan Ruak, Segunda (29/4/2019), iha Palásiu Governu, hasoru malu ho Governadór Banku Sentrál Timor-Leste (BCTL), Abrão de Vasconselos. Imajen/ Antonio Goncalves

DILI, 29 abr 2019 (TATOLI)-Governu da-ualu ne’ebé lidera hosi Primeiru-Ministru, Taur Matan Ruak, sei halo investimentu barak iha Kosta Súl. 

Refere investimentu ne’ebé sei envolve mós setór privadu nasionál, maka Primeiru-Ministru, Taur Matan Ruak, ohin, iha Palásiu Governu, hasoru malu ho Governadár Banku Sentrál Timor-Leste (BCTL-sigla portugés), Abrão de Vasconcelos, hodi diskute kona-ba kontribuisaun sistema finanseira ba implementasaun projetu sira iha kosta súl.

“Projetu iha Kosta Súl agora daudauk maka auto estrada no governu iha planu ba futuru  sei halo investimentu lubuk ida, tanba ne’e, investimentu ne’e presiza akompaña hosi setór privadu sira”, informa Governadór BCTL, Abrão de Vasconselos, ba Jornalista sira hafoin hasoru malu ho Primeiru-Ministru.

Enkontru ne’e mós nu’udar meius ida atu Primeiru-Ministru rona opiniaun hosi BCTL kona-ba sistema bankária  atu ajuda fasilita finansiamentu ba setór privadu sira iha Kosta súl  atu hola parte iha dezenvolvimentu iha área turizmu, agrikultura, indústria petrolíferu  no seluk tan.

“Diskusaun barak liu ne’e oinsá ita prepara ita nia populasaun sira iha Kosta Súl ba sira nia asesu ba  finanseira báziku, kréditu, mikro kréditu iha servisu bankária sira seluk”, hateten Abrão de Vasconcelos.

Nia esplika katak, banku komersiál ida iha asaun hamutuk millions  US$982  no bele fó kréditu  ba timoroan ho  total asaun millions US$200 de’it, entaun depózitu sei barak tanba ne’e sei iha osan barak atu mobiliza hodi investe iha área produtivu.

“Iha ezersísiu lubuk boot ida presiza halo, maibé hahú hanoin diskusaun sira hanesan ne’e di’ak liuliu kompromisu banku sentrál sira hatudu (fó kréditu)”, nia realsa tán.

Iha sorumutuk  ne’e, parte rua  mós ko’alia  kona-ba dezenvolvimentu ekonomia iha rai laran, planu governu ba 2020, liuliu dezenvolvimentu ba setór privadu intermus sistema garantia kréditu  hodi asesu finansiamentu hosi governu.

 Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here