Diretór Jerál Autoridade Aduaneira (AA), José António Fátima Abílio. Imajen/Egas Cristovão

DILI, 29 abr 2019 (TATOLI) – Autoridade Aduaneira (AA) iha trimestre dahuluk 2019 ne’e rekolla ona reseita hamutuk milliaun $19 resin.

Diretór Jerál AA, José António Fátima Abílio, hatete iha Janeiru Alfándega rekolla reseita milliaun $5 resin, Fevereiru milliaun $7 resin, Marsu milliaun $4 resin, no to’o iha klaran Abríl nian hetan milliaun $2 resin mós.

“Ne’e maka reseita 2019 nian ne’ebé ami halo esforsu para halo kobransa”, Abílio afirma iha edifísiu Alfándega ohin, iha área Palásiu Governu nian.

Bainhira kompara retornu ne’ebé hetan ne’e iha trimestre primeiru 2018 no agora iha mudansa kuaze iha aumenta diferensa milliaun $2 hanesan ne’e.

Haree ba diferensa ne’e, liga ba movimentasaun komérsiu komesa la’o di’ak fali ona, embora Timor-Leste enfrenta impase polítika tinan rua tuir malu, maibé ho aprovasaun orsamentu 2018 mai tan tinan ne’e komérsiu hahú la’o normál fali ona.

Haree ba retornu ne’ebé Alfándega hetan, José António, dehan husi portu nian maka boot liu tanba kontentór hotu tama husi fatin ne’e, tuirmai mak husi Batugadé tanba movimentasaun fuzu boot sira tanba kondisaun estrada hahú di’ak ona, entaun ema komesa hatama ona sasán ba nesesidade bázika nian liuhusi fronteira.

“Aeroportu ne’e mós tama, mas sei menus tanba cargo ho hand carry de’it. Cargo ne’e normálmente ema haruka liuhusi ne’ebá tanba lalais nia to’o mai ona, mas depende ba ita-nia maluk ka kompañia ne’ebé hakarak utiliza cargo tanba ne’e selu karu uitoan”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here