Sorumutu Vise-ministru tailandez, Jenerál Surachet Chaiwon hasoru malu ho nia omólogu Timor-Leste, João Zacarias Freitas. Foto TATOLI: Rafy Belo

DILI, (TATOLI)-Governu Tailándia hakarak apoia Timor-Leste iha área edukasaun vokasionál.

Liuhosi enkontru entre Vise-Ministru Edukasaun Tailándia, Jenerál Surachet Chaiwon, ho nia omólogu  hosi Timor-Leste, João Zacarias Freitas Soares, demonstra interese Governu Tailándia nian ba ida ne´e.

Vise-ministru Edukasaun, Juventude no Desportu, João Zacarias Freitas ba jornalista sira, iha konferénsia imprensa konjunta, hateten, vizita ida ne´e hanesan vizita bilaterál ida hodi hametin liután kooperasaun entre governu Tailándia ho Timor-Leste inkluzivamente iha área edukasaun nian.

“Ami diskute asuntu estratéjiku balun, oinsá país rua ne´e bele koopera no serbisu hamutuk iha área edukasaun. Ami diskute liuliu relasiona ho ensinu sekundáriu, iha tékniku vokasionál”, informa Vise-ministru, João Zacarias Freitas, iha edifísiu Ministériu Edukasaun, Juventude no Desportu (MEJD), Vila verde, Dili, Kinta  loro-kraik (25/04/2019).

Tailándia nu´udar nasaun ida iha ASEAN iha ensinu vokasionál ne´ebé expertu, kapás, iha esperiénsia lubuk. “Nune´e iha enkontru laran ami konsege ko´alia ida ne´e, nune´e oinsá husu sira-nia apoiu atu bele ajuda liuliu iha área ne´ebé mak relasaun ho ensinu tékniku vokasionál”.

Nia reforsa katak iha ámbitu ida ne´e mak oinsá reforsa kapasidade manorin na´in sira nian; área téknika profisionál ba ita-nia profesór sira.

Vise-ministru mós haktuir durante sorumutuk ho nia omólogu Tailandés ne´e ko´alia mós kona-ba oinsá halo reforma ba kurríkulu nasionál ba iha ensinu tékniku vokasionál ninian.

 “Ita sei halo revizaun balun iha kurríkulu ba iha ensinu sekundáriu nune´e diskusaun ida ne´e bele asegura Timor-Leste bele hetan mós benefísiu iha kooperasaun ho ita-nia maluk Tailándia nian”, hateten João Zacarias Freitas.

Tékniku husi parte rua sei kontinua diskute no elabora detalla liután kona-ba estratéjia sira ba kooperasaun ida ne´e. “Ami mós hato´o oinsá mak atu bele asina Memorandum of Understanding (MoU) ho Tailándia ho nune´e ba oin bele serbisu hamutuk ho di´ak”, dehan Vise-ministru, João Zacarias Freitas.

Iha fatin hanesan, Vise-ministru Edukasaun Tailándia, Jenerál Surachet Chaiwon kompromete apoiu Timor-Leste nu´udar mós kontribuisaun ida tanba ne´e hakarak atu estabelese ekipa ida hodi elabora nota entendimentu ida hodi bele asina hamutuk, hala´o serbisu apoia malu.

“Sei kontinua ho projetu balun, no sei iha inisiativa ba joven sira nasaun nian. Ami asegura ami-nia apoia tomak hodi serbisu hamutuk ho Ministériu Edukasaun Timor-Leste nian ba benefísiu dezenvolvimentu entre nasaun rua,” konklui Vise-ministru Edukasaun, Jenerál Surachet Chaiwon.

Jornalista: Rafy Belo

Editór: Francisco Simões

HAKEREK NO HATÁN

Please enter your comment!
Please enter your name here