Prezidente Kámara Komérsiu Indústria Timor-Leste (CCI-TL), Oscar Lima, ho nia estrutura dadalia ho jornalista sira iha Palásiu Prezidene Nicolau Lobato, Bairru Pité, foin lalais. Imajen Mídia Palásiu PR.

DILI, (TATOLI) – Prezidente Kámara Komérsiu no Indústria Timor-Leste (CCI-TL, sigla portugés), Óscar Lima, husu ba Governu Timor-Leste atu prepara kondisaun para setór privadu nasionál hodi bele halo kompetisaun ho setór privadu internasionál.

“La’ós ami ta’uk, sira-nia kbiit bele maka’as liu, ami-nia kbiit bele porsentu 50, maibé ami mós tenke presiza moris”, Óscar afirma iha ámbitu aniversáriu Asosiasaun Emprezariál Feto Timor-Leste (AEMTL, sigla portugés) ba da-XI iha embaixada Portugál, ohin.

Óscar hakarak hatete ida ne’e tanba iha polítika Governu nian iha buat ida ne’ebé tau katak local content (konteúdu lokál) mas ida ne’e la implementa.

“Tanba kna’ar ne’e tuir loloos tenke fahe duni ona, porsentu 30 fó duni ona ba timoroan, hanesan ne’e ita bele kapasita ita-nia setór privadu para aban-bainrua mina ne’e maran tiha mós mínimo dos mínimos setór privadu bele diversifika an tanba laiha setór indústria, hanesan ne’e sira bele fó kontinuidade nasaun nian, se lae ita nunka mais atu bá oin”.

Tanba ne’e husu Governu se bele haree didi’ak polítika kona-ba konteúdu lokál (local content) ne’e.

“Ha’u la fó kulpa ba emprezáriu internasionál, husu direitu ba Governu Timor-Leste hanesan Governu ida ne’ebé ha’u-nian, ne’ebé maka reprezenta ha’u iha Timor-Leste atu fó direitu ne’ebé ami iha, se bele fó netik mai ami”.

Prezidente ne’e husu mós ba maluk emprezáriu sira katak oportunidade lubun ida maka uluk Governu fó ona mak pakote referendu, eletrisidade, estrada no buat barak uluk ne’e fó de’it.

“Oportunidade ne’ebé ita-boot sira hetan ne’e, se iha osan ona rai halo di’ak, kuida halo di’ak, jere halo di’ak para bele aproveita oportunidade ne’e bá futuru, se lae tempu hotu ona’.

Óscar relata bainhira hasoru malu dala hira ho atuál Governu katak sei la fahe projetu ida ne’ebé adjudika direta.

“Ami rona katak sei laiha buat ida adjudikasaun direta. Husi Primeiru-Ministru rasik hakarak hotu-hotu tenke loke ba públiku para hotu-hotu bele konkorre, assim bele hetan nia legalidade”, afirma.

Nia hatutan: “Tanba ne’e maka ha’u husu, ita agora ne’e hotu-hotu hanoin de’it katak projetu. Ami halo projetu, ami hatete ba Na’i sira, ministru, xefe departamentu sira, ami hakarak diversifika ami-nia área, ami iha osan uitoan atu diversifika, mas ladún fasil tanba kuandu atu halo indústria ruma tenke husu mós ajuda husi banku, ne’e globalmente hanesan ne’e”.

Bainhira iha dolar milliaun ida no husu tan milliaun dolar ida tan husi banku para bele halo indústria ruma, problema boot ne’ebé hasoru mak kona-ba jurus no jurus ne’e agora iha porsentu 12, 13.

“Ami la konsege moris ho ida ne’e no laiha indústria Timor-Leste enkuantu jurus ne’e karun hanesan ne’e. Rai seluk ema nia jurus porsentu 2,3 ita-nian iha ne’e sai to’o porsentu 12,13”.

Tanba ne’e husu se bele Governu bele halo mós ninia intervensaun ou ko’alia ho banku sira oinsá maka bele haree kestaun ne’e.

“Ami ko’alia ona ho Banku Sentrál konsege halo ona buat ruma, maibé ami espera karak la to’o karik se bele Governu ko’alia, aléinde ko’alia halo lei sira ne’ebé maka kona-ba rai tanba rai ne’e nia lei benefisia ba emprezáriu sira, hanesan ne’e emprezáriu sira tau ba buat ida kollaterál ne’e para sira bele fó garantia ba banku, hanesan ne’e banku nia jurus bele tun ita bele buka atu halo indústria iha Timor-Leste”.

Óscar salienta hanesan timoroan hotu-hotu preokupa oinsá atubele dezenvolve Timór no atu dezenvolve hotu-hotu tenke hamutuk hanoin atubele atinje objetivu prinsipál.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here