DILI, (TATOLI) – Diretór Eskola Portugueza Ruy Cinatti, Acácio José Azevedo de Brito, ho ninia ekipa halo enkontru ho Primeiru-Ministru (PM), Taur Matan Ruak, hodi relata lala’ok eskola no tempu badak sei partisipa enkontru iha estranjeiru.

“Ami halo enkontru ho Primeiru-Ministru hodi informa ami sei ba partisipa iha enkontru anuál Eskola Portugueza ne’ebé sei realiza iha Kabuverde ne’ebé sei relata kona-ba eskola portugueza no análiza ne’ebé halo ona kona-ba sistema edukasaun timoroan ho relasaun entre portugal no Timor-Leste”, tenik ba jornalista sira iha Palásiu Governu, sesta (26/4/2019).

Diretór Eskola ne’e agredesse disponilidade Xefe Governu hodi rona informasaun no ideia, nune’e aproveita informa kona-ba eskola portugueza ne’ebé agora dadauk servisu hamutuk professora portugés sira iha Timor no professora timoroan.

Nia mós koa’lia uituan kona-ba kuríkulu ne’ebé eskola ne’e uza hanesan hanesan kuríkulu iha Portugal, nune’e alunu sira ne’ebé remata sekundáriu, bele koloka iha sistema edukasaun timoroan, kualker universidade no mós eskola hotu iha nasaun sira ho lian portugueza (CPLP-sigla portugés).

“Eskola portugés permite nia alunu hodi bele estuda iha nasaun hotu. Iha tinan kotuk porsentu 56 koloka iha opsaun dahuluk iha portugal, iha alunu ne’ebé tama medisina, diretu, enjiñeria no seluk tan. Eskola portugueza fó kapasitasaun atu bele dezenvolve kompeténsia iha nasaun seluk”, katak.

Enkontru anuál Eskola Portugueza sira iha estranjeiru ba tinan ne’e sei realiza iha Kabuverde iha loron 3 to’o 7 maiu.

Enkontru anuál ne’e ba diretór eskola portugueza sira iha estranjeiru, profesór, formadór, investigadór, estudante lisensiatura, pos-graduasaun no entidade seluk.

Programa ne’e sei kontempla konferénsia, painel, momentu reflesaun no fahe koñesimentu.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here