Abertura ba simpóziu ekonomia ho tema “glokalizasaun ba setór privadu ida ne’ebé dinámiku no diversifikadu" hodi komemora aniversáriu AEMTL ba da-XI. Imajen/espsiál

DILI, (TATOLI)-Asosiasaun Emprezariál Feto Timor-Leste (AEMTL-sigla portugés) kompromete sai autór ekonómiku ne’ebé ativu no produtivu.

Prezidente AEMTL, Hergui Luina Fernandes Alves, hateten lia hirak ne’e iha ámbitu selebrasaun aniversáriu AEMTL ba da-XI liuhosi simpóziu ekonomia ho tema “glokalizasaun ba setór privadu ida ne’ebé dinámiku no diversifikadu”, ne’ebé konsentra iha Embaixada Portugal iha Dili, Sesta (26/4/2019).

“Ha’u fiar katak ami bele, tanba kompromisu ida ne’e hatudu ona hosi ekipa dinámika AEMTL nian ne’ebé ho vontade di’ak atu servisu maka’as voluntáriamente no solidariedade atu alkansa ami-nia misaun”, Hergui afirma.

Prezidente AEMTL ne’e dehan, ida ne’e hatene husi susesu ba atividade tomak ne’ebé AEMTL hala’o tinan ida-resin inklui eventu simpóziu ne’ebé realiza ohin.

“Ne’e define katak se ita hakarak empodera feto sira tenke husik sira envolve an ka hola parte. Ha’u orgullu ba ha’u-nia ekipa ba prestasaun servisu no mós orgullu katak ami iha pájina ne’ebé hanesan atu dezenvolve ami-nia an no ami-nia negósiu atu muda mindset (hanoin) husi independénsia ba independente no sustentavel hodi kontribui ba moris di’ak ami-nia an, família no rai doben Timor-Leste”, afirma Hergui Luina Fernandes Alves.

AEMTL hala’o asaun hodi ka’er metin ba slogan ne’ebé maka maluk ida-idak iha nia pozisaun rasik sempre hatete “ha’u-nia misaun mak alkansa ita hotu-hotu nia mehi, envolve an sai forte no halo mudansa”.

Biban ne’e, Prezidente Kámara Komérsiu no Indústria Timor-Leste (CCI-TL-sigla portugés), Óscar Lima, felisita AEMTL tanba sira kriativa tebes no fó apoia totál ba asosiasaun ne’e tanba depois sai prezidente ba segundu períodu nian, hili husi AEMTL porsentu 30 iha órgaun sentrál CCI-TL nian.

“Ami la hili ema tanba nia bonita, ami hili tanba nia kapasidade, kriatividade, tanba ne’e maka ami hili AEMTL sai ami-nia parseiru no sai hanesan órgaun sentrál iha Kámara Komérsiu Indústria Timor-Leste”, hateten Oscar Lima.

Iha selebrasaun aniversáriu AEMTL ne’e, Prezidente CCI-TL kongratula AEMTL ba susesu AEMTL nian no husu atu susesu bá oin nafatin no susesu iha sira-nia kompañia ida-idak.

Notísia relevante :http://www.tatoli.tl/2018/04/aemtl-prontu-kompete/

Jornalista: Maria Auxiliadora

Editór: Francisco Simões

 

HAKEREK NO HATÁN

Please enter your comment!
Please enter your name here