Taxa ba jogu komemorasaun 20 maiu husi UNITAL. Foto TATOLI: Rafy Belo

DILI, (TATOLI)-Universidade Orientál Timor Lorosa’e (UNITAL) ho fundu  US$1.439 ba realiza  atividade desportiva   hodi komemora loron restaurasaun independénsia, 20 Maiu 2019.

Atividade desportiva hodi promove pás ne’ebé UNITAL realiza mak hanesan futeból salaun (mane vs mane) no volleyball entre feto ho feto no mós mane ho mane.

“Osan US$1.439 ne’e, ami utiliza ba ekipamentu desportivu nian. Objetivu husi jogu ida ne’e hodi ami komemora loron restaurasaun independénsia Timor-Leste nian hodi nune’e akumula joven no estudante sira iha UNITAL”, informa Prezidente Komisaun Organizadora, Amaro da Costa Tilman ba jornalista sira iha Kampus UNITAL, Becora-Dili, Kinta (25/04/2019).

Estudante Fakuldade Medisina ne’e akresenta tan katak, liuhosi atividade desportiva ne’e bele kontribui promove mós pás, hakribi violénsia. Alende, atrai joven no estudante sira hodi hatudu sira-nia talentu iha área desportiva.

Klube ne’ebé partisipa iha “jogu ba pás” ne’e hamutuk ualu (8), mai husi Fakuldade ualu iha UNITAL hanesan Fakuldade Edukasaun, Fakuldade Medisina, Agrikultura, Siénsia Sosiál no Polítika, Fakuldade Direitu, Fakuldade Enjeñaria, Fakuldade Ekonomia, Fakuldade Rekursu Naturál no Minerál no seluk tan.

“Komisaun organizadora sei prepara taxa ba manan na’in sira ka vensedór primeiru, segundu no terseiru lugar. Osan husi universidade ne’e mínimu tebes, entaun ami jere tuir fundu ne’ebé mak iha. Maske osan uitoan maibé ami otimista atu jere atividade tuir ami-nia mehi no objetivu universidade nian”, hateten Amaro da Costa Tilman..

Jogu ne’e abertura direta husi Magnífiku Reitór UNITAL, Florindo Perreira, ne’ebé fó hanoin ba jogadór sira atu  joga ho espíritu “fair play” katak konsidera malu hanesan amigu la’ós adversáriu.

Jornalista: Rafy Belo

Editór: Francisco Simões

 

 

 

HAKEREK NO HATÁN

Please enter your comment!
Please enter your name here