Reitór UNITAL, Florindo Perreira kaer liman ho Xefe Departamentu Komunikasaun TT, José Agostinho da Costa hafoin asina nota intendimentu. Foto TATOLI: Rafy Belo

DILI, (TATOLI)-Operadór Telekomunikasaun, Timor Telecom (TT) oferese internet gratuita ho velosidade megabite lima (5)  ba Universidade Orientál Timor Lorosa’e (UNITAL).

Ho oferta ida ne’e, Kinta (25/4/2019), Timor Telecom ho UNITAL asina nota entendimentu hodi fasilita prosesu aprendizajen no mós ba funsionáriu sira hodi presta servisu ho efetivu no kualidade.

“Obrigadu ba Timor Telecom ne´ebé ajuda ona UNITAL dezde uluk”, agradese Reitór UNITAL, Florindo Perreira ba Timor Telecom iha ámbitu asina nota entendimentu ne´e, iha Kampus UNITAL, Becora-Dili.

Akadémika UNITAL ne´e husu ba estudante sira atu kuidadu no uza ho didi´ak  internet hanesan ba interese peskiza, buka referénsia no traballu akadémiku sira, ne´ebé mak iha relasaun ho estudu tanba konsidera katak universitáriu ne´e la´ós de´it iha sala-aula nia laran maibé mós iha li´ur.

“Agora Timor Telecom ajuda ona UNITAL atu bele mós buka liuhosi internet. Parabéns ba UNITAL tanba Timor Telecom sei fó fiar atu kontinua fila fali ita-nia serbisu hamutuk ida ne´e i aumenta tan nia kapasidade”, afirma reitór UNITAL.

Servisu hamutuk TT ho UNITAL dezde 2013 maibé ho kapasidade megabite 2. Agora ho nota entendimentu foun, TT aumenta tan kapasidade internet nian ba megabite lima. Tanba ne’e, Reitór UNITAL husu ba estudante hotu atu uza ho responsabilidade.

Iha fatin hanesan, Xefe Departamentu Komunikasaun TT, José Agostinho da Costa, husu  mós atu uza ho responsabilidade tanba estudante no mai iha UNITAL tanba edukasaun.

“Ita labele fó buat ida ba sira, para sira halimar de´it. Ita hatene katak iha tempu modernu ida ne´e, dalaruma ema buka bosok no mós tebes, tanba ida ne´e ita mós hakarak eduka ita-nia alin sira (estudante) uza ho responsabilidade”, hateten José Agostinho iha entrevista ho Ajénsia TATOLI.

Nia mós konfirma katak rejistu kartaun ne´ebé governu fó sai liuhusi ANC Autoridade Nasionál ba Komunikasaun (ANC-sigla portugés) tenke rejistu hotu maibé to´o ohin loron empreza telekomunikasaun sira inklui TT sei kontinua rejistu tanba prolonga husi ANC rasik ho razaun katak utilizadór sira balun iha munisípiu, área remota liu no mós seluk tan.

“Ita kontinua kumpre autoridade ninia regulasaun sira. ANC dehan taka pasiénsia na´in hira ne´ebé seidauk rejista tenke taka duni. Persentajen ba ema ne´ebé rejistu ona kartaun TT, ita bele dehan katak kuaze 70%-80%”.

“Maibé, ha’u dehan loloos de´it katak rejistu hotu mas la hatene karik ema ne´ebé uza simcard ne´e la hetan informasaun ou iha hela foho. Meius hothotu ita halo, alende kompañia halo, husi ANC rasik mós halo. To´o tempu, se ANC dehan taka, ita tenke taka duni”, tenik  xefe departamentu komunikasaun TT, José Agostinho da Costa.

Partisipa iha asina nota entendimentu ne´e estudante sira UNITAL no mós dirijente ho funsionáriu sira ensinu superiór privadu ne´e nian.

Jornalista: Rafy Belo

Editór: Francisco Simões

HAKEREK NO HATÁN

Please enter your comment!
Please enter your name here