Ministru Transporte no Komunikasaun, José Agostinho da Silva ho Xefe Ajénsia Nasionál Buska no Salvamentu (BASARNAS - Badan Nasional Pencarian dan Pertolongan), Bagus Puruhito, asina akordu Search and Rescue (SAR) iha Edifisiu Basarnas, Jakarta, Indonezia. Imajen/ BASARNAS

DILI (TATOLI) – Timor-Leste (TL) ho Repúblika Indonézia (RI) asina ona akordu bilateral ba servisu buska ba transporte marítima ho aériu atu antesipa bainhira iha dezastre.

Akordu ne’e asina ona entreMinistru Transporte no Komunikasaun, José Agostinho da Silva ho Xefe Ajénsia Nasionál Buska no Salvamentu (BASARNAS/ Badan Nasional Pencarian dan Pertolongan), Bagus Puruhito, foin lais ne’e, iha Jakarta, Indonézia.

“Ha’u ba vizita iha Jakarta hodi asina MoU ho Kepala BASARNAS Indonézia, kona-ba dokumentu search and rescue (SAR), atu antesipa aban bain rua bainhira transporte marítima no aériu karik hetan dezastre ruma, ema prontu fó asisténsia ba ita”,  informa Ministru José Agostinho da Silva, ba Ajénsia TATOLI iha Palásiu Governu, Kinta (25/4/2019).

BASARNAS mós hato’o nia prontidaun atu fó formasaun ba Timoroan kona-ba oinsá bele halo buska no salvamentu ba ema sira karik hetan dezastre transporte aériu ho marítima.

Portal ofisiál BASARNAS nian mós haktuir katak, akordu bilateral entre Timor-Leste no Indonézia ne’e bazeia ba regra ne’ebé estabelese ona husi International Civil Aviation Organization (ICAO) no International Maritime Organization (IMO), ne’ebé sita bainhira iha nasaun ida mak halo buska ba vítima dezastre transporte marítima no aériu, nasaun seluk besik fronteira tenke servisu hamutuk hodi fó apoiu.

Liuhosi akordu ne’e Xefe BASARNAS hamutuk Ministru Transporte Indonézia no Ministru José Agostinho, iha esperansa bele reforsa abilidade SAR hodi fó treinamentu no koordenasaun ne’ebé di’ak, nune’e implementasaun SAR iha terrenu bele la’o ho afetivu.

Jornalista: Julia Chatarina

Editór: Francisco Simões

 

HAKEREK NO HATÁN

Please enter your comment!
Please enter your name here