Serimonia Asinatura Memorando de Entendimento (MDE) Entre Sekretáriu Estadu Ambiente Demétrio de Amaral de Carvalho no Diretór Ezekutivu Fundação Carbon Offset Timor Alexandre Rosa Bruno Sarmento,Imajen/Egas Cristovão

DILI (TATOLI)-Sekretáriu Estadu Ambiente (SEA) ho Fundasaun Carbon Offset Timor (COTI), Kinta (25/4/2019), asina memorandu entendimentu ida hodi promove kolaborasaun iha kestaun ambientál nian, liuliu iha área carbon offset  ka sekuestru gás dióksidu karbonu (CO2) liuhosi atividade reflorestamentu komunitáriu.

Sekretáriu Estadu Ambiente (SEA), Demétrio do Amaral de Carvalho, hatete memorandu ida ne’e atu asegura kooperasaun tanba Fundasaun COTI nia atividade ne’e liga ho parseiru sira iha li’ur, liuliu parseiru sira ne’ebé ohin loron buka hela investimentu merkadu karbonu voluntáriu tanba iha mundu agora iha sistema rua mak sistema voluntáriu basis no ida sistema ne’ebé liuhosi merkadu ofisiál karbonu nian ne’ebé tenke rejistu iha UN Triple C (Convention on Climate Change).

“Timor-Leste ratifika konvensaun ba mudansa klimátika, ita bele promove projetu sira iha Timor-Leste ne’ebé bele hatún gás estufa hanesan halo esforsu hodi capture karbonu, ne’e bele rejistu, dalan rua ne’e hotu ita bele uza, ida ofisiál maibé mós voluntáriu no dalan ida agora ita halo daudauk ne’e liuhusi parseiru sira ne’ebé voluntáriamente hakarak redús sira-nia emisaun liuhosi investimentu ne’ebé sira halo mai Timor-Leste liuhosi parseiru implementadór iha Timór hanesan COTI”, esplika Demétrio Amaral hafoin asina memorandu ne’e iha Bebora, Dili.

Demétrio konsidera, Timor-Leste tenke reforsa esforsu ida ne’e hodi bele kapitaliza rekursu sira ne’ebé potensiál ne’e mai Timór, la’ós de’it ba kuda ai, maibé mós nia valór sósiu-ekonómiku ne’ebé boot hanesan oferese bolsu estudu no mellora moris di’ak populasaun sira iha baze ne’ebé liuhosi projetu ne’ebé hala’o integradamente.

Demétrio do Amaral, esplika, tipu husi programa ida ne’e mak sira-nia asaun boot maka halo verde Timór ne’e aliña duni ho Governu nia esforsu atu halo Timór sai saudavel, sai matak liu tanba degradasaun floresta iha Timor-Leste atinje porsentu 1.1 kada tinan.

“Se ita foti territóriu Timór laran tomak porsentu 1.1 tinan-tinan, ita lakon liu ektare rihun 10. Ita halo esforsu barak tebes, maibé rezultadu uitoan de’it tanba ne’e Sekretáriu Estadu Ambiente haree katak halo parseria ho entidade sira ne’ebé iha tiha ona esperiénsia hanesan Fundasaun Carbon Offset Timor ne’e di’ak tanba iha tiha ona esperiénsia iha kampu”, Demétrio tenik.

Diretór Ezekutivu Fundasaun Carbon Offset Timor (COTI), Alexandre Rosa Bruno Sarmento, esplika mós katak, nota entendimentu ida ne’e atu estabelese plataforma komún ida kooperasaun no entendimentu entre Governu no COTI kona-ba atividade sekuestru karbonu.

Alexandre dehan, ida ne’e ideia ne’ebé relativamente foun iha Timór. Karbonu sekuestru ne’e to’os-na’in sira kuda ai-horis. Ai-horis no to’os sira-nian, maibé ai-horis nia kapasidade hodi xupa, atu absorve gás estufa husi atmosfera ne’e nia kréditu fó ba kompradór sira.

Kompradór sira ne’e mai husi empreza internasionál sira hanesan Toyota, Craft, Coca-Cola, Heineken, Boeing ka Air Bus sira ho empreza boot ne’ebé iha fábrika ka planta boot kuandu sira prodús sasán han, hemu ka buat atu uza, sira emite ba atmosfera gás estufa no entre gás estufa sira ne’e boot liu maka CO2.

“Objetivu kuda ai-horis atu xupa tiha fali gás sira husi atmosfera, ne’ebé ita kuandu dehan hamoos ambiente ne’e, hamoos rai, ita-nia bee-lihun, tasi, mota, maibé hamoos mós atmosfera tanba gás sira ne’e venenozu, hafo’er ita-nia atmosfera no kuandu nakonu demais atmosfera sira kontribui kauza ba alterasaun klimátika”.

Atividade Sekuestru Karbonu ne’e liuhosi reflorestasaun komunitáriu importante tanba ai-horis sira xupa gás estufa ne’ebé emite ba atmosfera husi fábrika no planta boot iha nasaun dezenvolvidu no industrializadu sira no husi atividade ekonómika prinsipál rua mak produsaun no konsumu.

Ai-horis sira iha kapasidade hodi xupa tiha gás fo’er ne’e husi atmosfera, nune’e bele hamoos fali atmosfera husi gás estufa sira ne’e, enkuantu empreza multinasionál sira ne’ebé emite gás fo’er ne’e ba atmosfera bele hamenus fali gás ne’e liuhusi fó osan ba komunidade ki’ik sira hodi kuda ai. Enkuantu to’os-na’in sira hetan osan, empreza sira ne’e hetan kréditu no ne’e maka bolu merkadu kréditu karbonu.

Atividade Sekuestru Karbonu ne’e Fundasaun COTI hala’o ona iha Postu Administrativu Laklubar no Soibada iha Munisípiu Manatuto dezde 2010 to’o agora.

Komunidade sira kontinua kuda ai-horis to’o ohin loron no durante besik dékada ida ne’e COTI servisu hamutuk ho to’os-na’in kuaze 300 iha postu rua ne’e hodi planta ai hamutuk rihun 200 resin, mas to’o agora ai-horis 170,000 maka moris no boot ona. Liuhusi atividade ne’e fó benefísiu diretu ba membru komunidade postu rua ne’e.

Kuaze tinan sanulu nia laran, COTI hamutuk ho nia parseiru internasionál hosi Austrália hanesan Group Training Northern Territory iha Darwin, Skillset, Amigos Laklubar no Governu Reinu Unidu fornese ona insentivu finanseiru ba komunidade postu rua ne’e ho osan hamutuk US$400,000.

Osan ne’e fó ba to’os-na’in sira atu sira bele kuda ai-horis no tau-matan ba ai hirak ne’e to’o tinan 30. Tanba funsaun husi ai-horis ne’e mak atu xupa gás dióksidu karbonu husi atmosfera no empreza sira ne’ebé fó osan ne’e hetan kréditu ba sira-nia emisaun CO2.

Tipu ai-horis ne’ebé kuda maka hanesan Mahoni, Kakeu, Samatuku, Teka Metan-Mutin no Ai-Kameli, no COTI ho komunidade sira ne’e mós kuda ai-fuan hanesan Diospiru, Abruñu, Nespra no Pésegu.

“Ai-fuan sira ne’e uluk portugés sira maka bá kuda iha Laklubar no Soibada, mas to’o agora ai-fuan sira ne’e kauza atu lakon hotu ona. Ne’e duni, COTI hamutuk ho to’os-na’in sira promove fali ai-horis hirak ne’e”,  hateten Alexandre Rosa Bruno Sarmento.

Nia hatutan, ai-horis ne’e la’ós de’it valór ekonómiku, maibé iha mós valór istóriku. Tanba ne’e COTI koko atu haburas hikas fali ai-horis istóriku hirak ne’e.

Kona-ba reflorestasaun ne’e COTI mós sei alarga tan ba postu administrativu viziñu sira iha Manatuto nian no mós fora husi ne’e maka Liquiçá, Oe-Cussé ho Bobonaro, atu habelar liután ideia ida ne’e atu ema barak mós bele benefisia husi ida ne’e.

Jornalista : Maria Auxiliadora  

Editór: Francisco Simões

HAKEREK NO HATÁN

Please enter your comment!
Please enter your name here