Prezidente Parlamentu Nasionál, Arão Noé de Jesus da Costa Amaral. Imajen Egas Cristovão

DILI (TATOLI)—Ministériu Públiku (MP) haruka ona karta ba Parlamentu Nasionál (PN) atu autoriza membru PN hosi Bankada CNRT, Francisco Kalbuadi Lay, submete ba investigasaun iha MP, maibé PN seidauk bele autoriza tanba karta ne’e la tuir prosedurál.

Membru PN hosi Bankada CNRT, Francisco Kalbuadi Lay. Imajen/António Goncalves

Ministeriu Publiku (MP) liuhosi Prokuradora titular ne’ebé kaer prosesu, haruka ona karta ba PN atu autoriza Deputadu Francisco Kalbuadi Lay, submete ba prosesu investigasaun ba kazu partisipasaun ekonomia ne’ebé deskonfia envolve hosi Francisco Kalbuadi Lay, atuál membru PN no Sekretáriu Jerál partidu CNRT.

“Prosedurál karta haruka mai ne’e maka la loos tanba prokuradór prosesu maka haruka fali karta, maibé la’ós Prokuradór Jerál Repúblika maka haruka, entaun nia prosedimentu legál

la prienxe”, informa  Prezidente Parlamentu Nasionál, Arão Noé de Jesus da Costa Amaral, ba jornalista sira iha Palásiu Prezidente Nicolau Lobato, Bairru Pité, Kuarta (24/4/2019).

Arão Noe de Jesus da Costa Amaral dehan, foin lalais meza Parlamentu Nasionál hatún karta refere ba Komisaun A asuntu Justisa, maibé Komisaun A halo fali paresér ida mai PN katak pedidu ne’e la tuir dalan, entaun Parlamentu Nasionál devolve fali ba iha Ministériu Públiku atu prienxe sasán tuir baze legál.

Nia fó hanoin atu labele haluha katak Timor-Leste Estadu direitu no Estadu ne’e hakru’uk ba konstituisaun no lei, maibé la’ós atu hakru’uk ba ema.

“Ne’e duni maka ami husu katak buat hotu-hotu tenke la’o tuir konstituisaun no la’o tuir lei no husu órgaun sira hotu tenke kumpre regra hirak ne’e”, tenik  Prezidente PN, Arão Noe de Jesus da Costa Amaral.

Jornalista: Xisto Freitas

Editór: Francisco Simões

 

HAKEREK NO HATÁN

Please enter your comment!
Please enter your name here