Ministru Edukasaun Ensinu Superior kaer liman ho Ministru Edukasaun Indonézia nian. Imajen António Gonçalves

DILI, (TATOLI) – Governu Timor-Leste no Indonézia iha kompromisu atu  kontinua hametin kooperasaun iha setór edukasaun no kultura iha futuru.

Kompromisu ne’e hato’o hosi Ministru Edukasaun no Kultura Indonézia, Munajir Effandy, bainhira hasoru malu ho Ministru Ensinu Superiór, Siénsia no Kultura, Longuinhos dos Santos, iha ninia kna’ar fatin, ohin.

“Iha soru-mutu ne’e atu fó oportunidade ba foin-sae timoroan atu kontinua estuda iha Indonézia”, dehan Ministru Indonézia ne’e ba jornalista sira.

Munajir Effandy dehan dezenvolvimentu setór edukasaun iha nasaun foun ne’e hahú la’o di’ak maibé presiza atu hadi’a di’ak liután.

Iha oportunidade hanesan Ministru Longuinhos dos Santos hatete soru-mutu ne’e hodi diskute kona-ba planu kooperasaun liuliu jestaun ba biblioteka, muzeu, estudu komparativu no promove kultura TL iha Indonézia.

“Iha soru-mutu ne’e ami ko’alia liuliu atu revee memorandu entendimentu iha tinan kotuk liubá ninia durasaun remata ona no diskute atu dezenvolve rekursu umanu liuliu jestaun ba biblioteka, muzeu, estudu komparativu  no promove ita nia kultura Timor-Leste iha Indonézia ida ne’e maka ohin iha diskusaun ho ministru edukasaun no kultura Indonézia”, informa Governante.

Atu estabelese kooperasaun ne’e maka, ministru Longuinhos dos Santos ho ekipa sei vizita Indonézia hodi hasoru malu ministru ensinu superior no kultura Indonézia hodi diskute planu kooperasaun ne’e iha tempu badak hodi legaliza ho memorandu entendimentu ida.

Entretantu, vizita Ministru Edukasaun no Kultura Indonézia  Munajir Effandy iha TL atu loke expo ka feira ensinu superiór iha TL no inaugura sentru kultura Indonézia.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here