Logo FONGTIL

DILI, (TATOLI) – Diretór Ezekutivu Forum Organizasaun Naun Govermentál Timor-Leste (FONGTIL), Daniel Santos do Carmo, husu ba Komisaun Inkéritu Parlamentár (KIP) ba projetu 143 atu respeita kna’ar hanesan reprezentante povu hodi lori relatóriu inkéritu ba plenária.

“Sira rasik dezafia sira nia servisu, sira rasik la respeita sira nia kna’ar, sira dehan reprezentante povu maibé realidade la iha, tanba sira reprezenta de’it sira nia interese polítiku iha laran”, dehan nia ba TATOLI iha Kaikoli, ohin hodi komenta relatóriu KIP ne’ebé seidauk halo diskusaun iha plenária.

Ho situasaun ne’e nia mós sujere ba instituisaun Estadu hanesan Komisaun Anti Korupsaun (KAK), Provedoria Direitu Ema-nian no Justisa (PDHJ-sigla portugés), Inspetór Jerál Estadu (IJE) no sosiedade sivíl hodi toma inisiativa buka hatene, tanbasá mak relatóriu ne’e la hetan aprovasaun hosi membru KIP hodi lori ba diskute iha plenária.

“Karik buat ruma naksalak, karik sira ta’uk kuandu sira aprova, sira mós kona ka sira hakarak husik responsabilidade. Nune’e maka KAK, PDHJ, IJE, Sosiedade Sivíl presiza loke investigasaun atu hatene sá motivu maka relatóriu prodús ona maibé la hetan aprovasaun”, afirma.

Tuir Daniel Santos, kuandu relatóriu ne’e seidauk hetan aprovasaun no diskusaun, signifika la iha dalan ba Ministériu Obra Publika, Konsellu Administrasaun Fundu Infraestrutura (KAFI), Ajénsia Dezenvolvimentu Nasionál (ADN) atu hola desizaun hodi selu.

Sikun seluk, Ministru Reforma Lejizlativa no Asuntu Parlamentár (MRLAP), Fidelis Leite Magalhães, subliña kuandu iha projetu 143 iha kontratu, signifika governu avansa ho pagamentu maibé entre projetu hirak ne’e, 20 resin presiza halo verifikasaun hafoin bele prosesa.

Maibé lista balun ne’ebé la tama iha KIP nian ka projetu 20 rein konforme informasaun sira, presiza halo verifikasaun no governu sei haree oinsá atu bele efetua parlamentu.

“Ida ne’ebé maka iha ona kontratu governu bele prosesa pagamentu, no hirak ne’ebé la iha tenke verifika”, afirma ba jornalista sira iha Palásiu Governu, ohin.

Antes ne’e Ministru Obra Públikas, Salvador Pires, dehan entre projetu 143 ne’e, 45 maka la iha kontratu maibé iha dezembru tinan kotuk hosi 45 aprova ona projetu 15, tan ho projetu hirak ne’e ho karater urjénsia ne’ebé aprezenta hosi AND no ajénsia relevante iha KAFI atu hetan aprovasaun.

Entretantu, solusaun KAFI maka la konsege rezolve tenke lori ba Konsellu Ministru hodi haree no foti desizaun ba projetu sira.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here