Sekretáriu Estadu Ambiente, Demétrio de Amaral de Carvalho, no Fundasaun Carbon Offset Timor (COTI) entrega bolsu estudu ba estudante universitáriu Laklubar hamutuk 13 ne’ebé agora daudaun estuda iha universidade sira iha Dili laran. Imajen Egas Cristovão

DILI, (TATOLI) – Fundasaun Carbon Offset Timor (COTI) ne’ebé halo atividade Sekuestru Karbonu liuhusi reflorestaun komunitária, hamutuk ho nia parseiru sira fornese bolsu estudu ba Laklubar oan hamutuk 13 ne’ebé hala’o estudu iha universidade públiku no privada iha Dili ne’ebé interese iha área agrikultura no ambiente.

Bolsu estudu ne’ebé fó ne’e, ba estudante sira ne’ebé mai husi família vulneravel ne’ebé hetan nota no dezempeñu akadémiku di’ak.

Diretór Ezekutivu COTI, Alexandre Rosa Bruno Sarmento, hatete bolsa ne’e atu ajuda sira hodi selu propina no mós despeza bázika balu ne’ebé sira sei halo hanesan selu alojamentu iha Dili.

“Osan sira ne’e mai husi Fundasaun Carbon Offset Timor nia parseiru sira, nomeadamente Amigo Laklubar, Group Training Northern Territory iha Darwin no mós indivíduu Australianu balu ne’ebé hakarak fó bolsu estudu ne’e ba sira”, Alexander informa ohin, hafoin asina nota entendimentu ho Sekretáriu Estadu Ambiente (SEA), Demétrio do Amaral de Carvalho.

Servisu hamutuk ne’e hodi promove kolaborasaun iha kestaun ambientál nian, liuliu iha área carbon offset ka sekuestru gás dióksidu karbonu (CO2) liuhusi atividade reflorestamentu komunitáriu.

Atividade Sekuestru Karbonu ne’e Fundasaun COTI hala’o ona iha postu administrativu Laklubar no Soibada iha munisípiu Manatutu dezde 2010 to’o agora.

Sekretáriu Estadu Ambiente hatete fundasaun ida ne’e halo serbisu ida ne’ebé exelente tebes no hodi Governu nia naran hato’o agradese ba esforsu hotu ne’ebé COTI halo.

“La’ós de’it hamatak ita-nia rai, maibé prepara jerasaun futuru sira ne’ebé bele hodi Timor-Leste sai forte liután”.

País nia riku boot liu la’ós mina no tasi, maibé nia riku boot liu maka nia ema sira, maibé tenke prepara nia ema, tanba ne’e Demétrio felisita COTI ho esforsu boot fó bolsu estudu ba timoroan sira ne’ebé sei sai futuru ba nasaun.

Aleinde fó bolsu, COTI mós hamutuk ho nia parseiru konstrui edifísiu eskola ho sala tolu iha Eskola Sekundária Katólika Laklubar.

“COTI halo atividade Carbon Offset ne’e iha maneira ida ne’ebé integradu katak la’ós haree de’it ba ambiente hanesan kestaun izoladu ida, maibé ami haree mós ba kestaun sosiál sira ne’ebé komunidade hasoru”, afirma.

Nia hatutan: “Komunidade labele kuidadu ambiente ho di’ak sei sira-nia kestaun sósiu-ekonómiku seidauk rezolvidu. Iha Laklubar, porezemplu, ami fó bolsu estudu ba estudante sira atu sira bele tau-matan ba ai-horis ne’ebé ami kuda iha resintu eskola nian”.

Benefisiáriu, Agostinha Mendonça, ne’ebé estudu iha Universidade Nasionál Timor Lorosa’e semestre lima iha Departamentu Dalen Portugés, orgullu tanba COTI bele apoia sira hodi kontinua estudu iha universidade no bainhira remata hakarak kontribui iha fundasaun ida ne’e.

Liuhusi bolsu ne’e bainhira iha programa ruma ne’ebé COTI hala’o sira mós partisipa liuliu hanesan kuda ai-oan no tuir semináriu ne’ebé ko’alia kona-ba plantasaun nian.

“Tanba dezde sekundária sira fó bolsa no iha ne’ebá ami kuda ai-oan to’o mai universidade”.

Jornalista: Maria Auxiliadora

Editora: Rita Almeida

1 KOMENTÁRIU

  1. ho laran luak hau kontente ho informasaun ida nee tebes maibe hau atu sujere deit ba Director ezektivu Coti katak karik bele fo mos ba manatuto parte natarbora oan sira nebe agora hamahon hela iha Nivel universidade.

HAKEREK NO HATÁN

Please enter your comment!
Please enter your name here