Ministru Estadu Prezidénsia Konsellu Ministru, Hermenegildo Augusto Cabral Pereira, ho Ministra Finansa en ezersísiu, Sara Brites Lobo, ba jornalista sira hafoin enkontru Konsellu Ministru, kuarta, (27/2/2019). Imajen Egas Cristovão

DILI, (TATOLI) – Governu Timor-Leste (TL), Indonézia no Banku Dezenvolvimentu Aziátiku (ADB, sigla portugés) sei asina memorandu entendimentu kona-ba asisténsia téknika ba komérsiu fronteirisu no kooperasaun.

Akordu ne’e sei hala’o iha 4 maiu tinan ne’e, durante soru-mutu anuál ADB nian iha Fiji, husi Ministra Finansa Timor-Leste, Ministra Finansa Indonézia no Prezidente ADB.

“Ne’e memorandu ida hanesan define liña jerál de’it, maibé nia ámbitu aplikasaun ne’e ba iha ministériu lubuk ida hanesan Transporte, Turizmu, Finansa, Agrikultura, Saúde”, Sara informa hafoin reuniaun KM bainhira Governu aprova proposta memorandu ne’ebé nia aprezenta atu asina entre parte tolu ne’e, ohin.

Output (rezultadu) husi akordu ne’e atu legaliza tiha komérsiu iha fronteira, tanba durante ne’e komunidade halo hela esportasaun ilegál Karau bá iha Timór Osidentál (NTT) no sira mós halo importasaun manu no manu oan sira.

“Buat sira ne’e hotu tenke legaliza tanba ne’e ligasaun ba iha moras ne’ebé maka da’et husi animál sira ne’e, entaun iha kooperasaun ida para bele hetan tiha lisensa no ofisializa tiha para loke ba públiku para negósiu ka atividade ekonómika funsiona iha ámbitu legál”.

Ministru Estadu Prezidénsia Konsellu Ministru, Hermenegildo Augusto Cabral Pereira, hatete nota entendimentu husi MF ne’ebé parte tolu, Timor-Leste, Indonézia no ADB maka sei asina ne’e asisténsia téknika ba área komérsiu liga ho fronteirisu ho kooperasaun ne’e Ministériu Negósiu Estranjeiru no Kooperasaun (MNEK) maka sai ajénsia koordenadora ba Estadu Timor-Leste.

“Maibé envolve mós Ministériu Finansa tanba evolve mós osan, Ministériu Agrikultura no Peska no Ministériu Turizmu, Komérsiu no Indústria, Ministériu Saúde, Ministériu Transporte no Komunikasaun halo parte hotu iha área implementasaun ida ne’e”.

Ba akordu ida ne’e KM fó podér tomak ba Ministra Finansa interina atu asina.

Memorandu ida ne’e tuir pedidu ne’ebé realiza husi Governu Timor-Leste, Indonézia no ADB atu apoiu no fortalese kooperasaun fronteirisu ho forma atu promove dezenvolvimentu rejiaun ida ne’e.

Iha finál 2018 termina ona estudu esploratóriu ne’ebé maka rekomenda área prinsipál tolu ba kooperasaun-transporte no komunikasaun, turizmu no pekuária.

Akordu ida ne’e sei fó dalan atu armoniza prosedimentu sira husi fronteira hodi hasa’e kualidade husi konetividade entre nasaun rua ne’e, expansaun sistema sertifikasaun saúde animál no dezenvolvimentu iha área turístika hamutuk haree liu ba turizmu sustentavel no komunitáriu.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here