Diretór Jerál Asuntu ASEAN, Jorge Trindade Camões. Foto TATOLI: António Gonçalves

DILI, (TATOLI) – Diretór Jerál Asuntu Asosiasaun Nasaun sira iha Sudeste Aziátika (ASEAN), Jorge Trindade Camões, hatete Timor-Leste nia adezaun ba ASEAN depende membru sira nia desizaun bainhira mak sente konfortavel hodi aseita.

“La iha país ida husi ASEAN dehan lakohi atu simu ita. Ha’u hanoin kestaun tempu, kontinua prepara ita-nia aan, momentu ne´ebé mak sira dehan ita sai membru, ita prontu atu sai membru ASEAN”, hateten Diretór Jorge Trindade Camões  iha Otél Novo Turizmu, Lecidere, kuarta (24/4).

“Singapura nunka dehan katak sira la autoriza ita-nia adezaun ba ASEAN, ne’e polítika ASEAN ninian kona-ba konsensu, tanba ne’e mak ita hein, ita lalika dehan ida ne’e, ida ne’ebá, polítika ASEAN nian mak ida ne’e”.

Konfirma ba mídia, Jorge Neves katak semináriu ARF ne’ebé Timor-Leste sai “Uma Na’in”, iha ligasaun ho kompromisu Timor-Leste nian hodi sai membru ofisiál ida ba organizasaun ne’e.

Katak, organiza eventu internasionál ne’e, Timor-Leste mós hakarak hatudu nia kapasidade, tuir pre-rekizitu balun ASEAN nian, hodi partilla mós esperiénsia Timor-Leste nian.

“Ita iha buat di’ak barak iha rai laran, maibé infelizmente ita seidauk iha oportunidade barak atu fahe. Ne’ebé, ha’u hanoin oportunidade ida ne’e di’ak tebes atu fahe ba membru ARF sira tomak kona-ba Timór nia esperiénsia rasik kona-ba prevensaun konflitu i buat hothotu ne’ebé mak ita halo iha ne’e, ita-nia atividade balun ne’ebé ita halo liuhusi mekanizmu G7+, ita mós sei ko’alia iha ne’e hotu”.

Nasaun membru sira mak Indonézia, Tailándia, Singapura, Malázia, Vietname, Filipina, Brunei, Kamboja, Myanmar, Laos.

Notísia relevante: http://www.tatoli.tl/2019/01/timor-leste-koalia-tlamp-ho-nasaun-membru-asean-haat/

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here