Prosesu funerál ba vitima sira atake bomba iha Sri Lanka. Imajen/REUTERS

DILI,(TATOLI) – Governu Timor-Leste hato’o solidariedade ba Governu no Povu Sri Lanka, liu-liu ba komunidade kristaun ne’ebé hetan atake bomba iha Igreja no iha otél ida iha sidade Colombo, Negombo no Batticaloa, Sri Lanka.

Kondisaun Igreja ne’ebé hetan atake bomba hosi terorista. Imajen/google

Atake bomba ne’ebé deskonfia lansa husi grupu Estadu Izlámiku (ISIS) ne’e rezulta ema na’in 207 mate no na’in 450 kanek iha loron selebrasaun Domingu Páskua, 21 Abril 2019.

Dadus ikus husi publikasaun mídia internasionál sira to’o ohin katak, vítima ne’ebé mate hosi trajédia kontra umanidade ne’e aumenta ona ba na’in 321.

“Ami nia hanoin iha momentu ne’e, hamutuk ho povu Sri Lanka no liuliu ho sira hotu ne’ebé mak afetadu diretamente hosi akontesimentu ne’e. Governu Timor-Leste manifesta ninia solidariedade ba povu no Estadu Sri Lanka no ba nasaun sira seluk ne’ebé afetadu husi eventu trájiku ida ne’e”, hateten portavós VIII Governu Konstitusionál nu’udar mós Ministru Estadu no Prezidénsia Konsellu Ministru, Hermenegildo Augusto Pereira, ne’ebé publika iha portal ofisiál Governu nian.

Autór terorista ne’ebé halo atake ba Igreja iha Sri Lanka mak tara pasta iha kotuk. Imajen/google

Governu Timor-Leste kondena atentadu hirak ne’ebé akontese iha Sri Lanka hanesan hahalok violénsia kriminoza no hato’o ninia laran triste ba família no maluk vítima sira nian.

Timor-Leste hato’o mós ninia apoiu ba Governu Sri Lanka,  ekipa médika no ekipa seguransa nian tomak, ne’ebé mak halo buat hotu tuir sira nia kbiit hodi hasoru situasaun trájika no difisil tebes ne’e.

Iha Tersa (22/4/2019), reprezentante povu Timor-Leste, liuhosi sesaun plenária Parlamentu Nasionál, fó votu solidariedade ho rezultadu unanimidade ba Governu no Povu Sri Lanka ba akontesimentu atake bomba iha fatin sira iha Sri Lanka.

Jornalista: Julia Chatarina

Editór: Francisco Simões

 

 

 

HAKEREK NO HATÁN

Please enter your comment!
Please enter your name here