Ministru Transporte no Komunikasaun, José Agostinho da Silva. Imajen/ António Gonçalves

DILI, (TATOLI) – Ministru Transporte no Komunikasaun (MTK), José Agostinho da Silva, rekoñese maske iha konfuzaun iha apoiu konstrusaun aeroportu internasionál Prezidente Nicolau Lobato Komoro, maibé Governu Japaun nafatin hatudu vontade di’ak hodi kontinua obra ne’ebé planeia ona.

“Buat konfuzaun no kontráriu, tanba iha nota ko’alia katak la aprova maibé deklarasaun embaixadór Japaun dehan fó nafatin, buat rua ne’e sai husi sira hotu. Ikus mai, hafoin prosesu ne’e la’o horibainrua rua embaixadór halo audiénsia ho ha’u no Primeiru Ministru hodi hatudu sira nia vontade oinsá mak oferese nafatin grant ba ita”, tenik ministru ba jornalista sira iha Palásiu Governu, kuarta (24/4/2019).

Hodi dehan tan: “Prinsípiu, ita ema ne’ebé mak simu, ita aseita no aselera prosesu no simu sira nia vontade di’ak hodi fó nafatin apoiu ba konstrusaun Aeroportu Internasionál Prezidente Nicolau Lobato”.

Governante ne’e admite rona ona katak horisehik Governu Japaun sira iha reuniaun gabinete para hola desizaun ikus ba apoiu orsamentu konstrusaun Aeroportu Internasionál Prezidente Nicolau Lobato ba Timor-Leste, maibé  nia rasik to’o agora seidauk asesu katak aprova ou lae orsamentu ne’e.

“Bainhira Embaixadór Japaun audiénsia ho ha’u, ha’u mós dehan karik bele relata ba ami dinámika Governu Japaun kona-ba ajenda ida ne’e karik aprova ou lae tenke hato’o ba Governu Timor-Leste. Maibé kuandu aprova ona, Grasas a Deus no Governu Timor-Leste prontu simu, tanba ida ne’e apoiu orsamentu ne’ebé ita sei la fó fila fali”, dehan.

http://www.tatoli.tl/2019/04/governu-japaun-mantein-halo-konstrusaun-aeroportu-komoro/

Parte Rua Asina Ona Ezbosu Projetu Aeroportu

Iha loron 11 fevereiru, MTK liuhosi ANATL, I.P. ho JICA konklui ona levantamentu preparatória hosi projetu hadi’a aeroportu Prezidente Nicolau Lobato Komoro.

Nune’e parte rua asina ona Minuta Diskusaun ba Relatóriu Ezbosu ba projetu ne’ebé ho sasin hosi Ministru José Agostinho da Silva no Embaixadór, Hiroshi Minami, Embaixadór Japaun no instituisaun relevante partisipa iha okaziaun ida ne’e.

Totál Orsamentu Ba Konstrusaun Aeroportu Milliaun $44

Iha konstrusaun ne’e, Governu Japaun sei oferese apoiu orsamentu hamutuk milliaun $44. Orsamentu ne’e sei hadi’a komponente lima hanesan terminál pasajeiru, torre kontrolu, upfront, tax way no para fatin ba aviaun.

konstrusaun ba aeroportu ne’e sei hahú iha marsu 2020, nune’e sei remata iha fulan 20 nia laran, hafoin entrega ba Governu Timor-Leste.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here