Prezidente Parlamentu Nasionál, Arão Noe de Jesus. Imajen/António Gonçalves

DILI, (TATOLI)—Prezidente Parlamentu Nasionál, Arão Noé de Jesus, hateten atu halo ratifikasaun ba tratadu fronteira marítima (FM) tenke ajusta lejizlasaun kona-ba impostu no reseita.

Arão Noe hateten, lejizlasaun ne’e iha atu regula parte ekonómika balun, ezemplu hanesan posu Bayu-undan no Kitan ne’e uluk fahe ho Austrália entaun ho delimitasaun fronteira ne’e bainhira ratifika buat sira ne’e tenke porsentu 100 (100%) pertense ba Timor.

“Presiza ajusta lejizlasaun balun, liu-liu ba impostu no reseita nian katak reseita ne’ebé uluk ita fahe ba Austrália porsentu 10 no ba Timor porsentu 90 ne’e sei nakfilak ba porsentu 100 ba Timor-Leste”, hateten Arão Noe ba jornalista sira iha Palásiu Prezidente Nicolau Lobato, Bairru Pité, Dili, Kuarta (24/4/2019).

Arão Neo informa katak, buat ruma maka tenke halo liu-liu governu tenke kria dekretu lei atu regulariza reseita no Parlamentu tenke aprova alterasaun ba tributária.

“Governu maka tenke iha inisiativa aprezenta mai Parlamentu. Ami hein se aprezenta mai, ami sei fó prioridade”, Arão Noe tenik.

Kona-ba Greater Sunrise, nia hatán, prosesu ne’e agora la’o daudaun no hein katak ratifikasaun ba tratadu delimitasaun fronteira bele fó konkretizasaun mezmu Timor-Leste sosa ona asaun porsentu 56 (56%) hosi Conoco Philips no Shell Energy.

Relasiona ho pedidu ba Austrália atu selu multa ba Timor bainhira tratadu fronteira marítima ratifika ona, Prezidente Parlamentu afirma, nia lakohi ko’alia to’o iha ne’ebá tanba ida ne’e tenke haree iha tratadu delimitasaun fronteira marítima.

Tuir nia katak tratadu maka sei determina saida maka tenke halo liu-liu akordu delimitasaun fronteira ne’e ko’alia kona-ba saida.

“Ita labele fó komentáriu arbiru de’it tanba orasida komplika fali sasán ne’ebé la tuir iha kontratu nia laran”, afirma Arão Noe de Jesus.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here