Komandante Jeral PNTL, Komisáriu Faustino da Costa. Imajen/Antonio Gonçalves

DILI, (TATOLI)—Lei Autoridade Nasionál Petrolíferu la permite atu hatama mina-rai mai Timor-Leste. Tanba ne’e, iha semana ida liu ba,  Komandu Polisia Nasionál Timor-Leste (PNTL) Munisipiu Liquiça, prende mina-rai liu tonelada rua ne’ebé mak tula ho ró iha area jurídiku Liquiça.

Komandante Jerál Polísia Nasionál Timor-Leste (PNTL), Komisáriu Faustinho da Costa, konfirma katak, lei permite de’it atu halo importasaun ba gazóleu ho gazolina, maibé la permite atu importa mina-rai.

“Primeiru, lei Autoridade Nasionál Petrolíferu la permite atu hatama mina-rai. Segundu, sasán ne’e mai la liuhosi prosedimentu normál ka liuhosi alfándega”, informa Komisáriu  Faustinho da Costa, ba jornalista sira iha Palásiu Prezidente Nicolau Lobato, Bairru Pité, Tersa (23/4/2019).

Iha Indonézia mós la permite atu halo esportasaun mina-rai, tanba Estadu Indonézia deside ona mina-rai hanesan  subsídiu ba nivel doméstika de’it.

Komisáriu Faustinho da Costa, subliña katak, sirkulasaun mina-rai iha Timor barak tebes, tanba ne’e PNTL sei halo servisu maka’as atu sita importasaun mina-rai, tantu hosi fronteira rai maran no tasi.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here