Primeiru-Ministru, Taur Matan Ruak, prezide reuniaun Konsellu Ministru iha Palásiu Governu. Imajen/Egas Cristóvão

DILI, (TATOLI) – Konsellu Ministru (KM) aprova alterasaun da-neen kona-ba akordu dezenvolvimentu entre Estadu Naklibur Amérika (EUA-sigla inglés) no Repúblika Demokrátika Timor-Leste (RDTL) ba fortalesimentu institusionál no kapasitasaun rekursu umanu ba dezenvolvimentu.

Ministru Estadu Prezidénsia Konsellu Ministru, Hermenegildo Augusto Cabral Pereira, hatete akordu ne’e ba dezenvolvimentu nasionál nian no tinan-tinan halo revizaun no ba dala-neen ona.

Ministra Finansa en ezersísiu, Sara Lobo Brites, salienta akordu ne’e husi parte Ajénsia Nasaun Naklibur ba Dezenvolvimentu Institusionál (USAID, sigla inglés) fó apoia ba Governu, liuliu kapasitasaun ba instituisaun no mós rekursu umanu.

“Ohin, Finansa lori mai Konsellu Ministru atu hetan deliberasaun para bele asina filafali akordu ne’e”, Sara afirma hafoin soru-mutu KM iha Palásiu Governu, ohin.

Sara dehan parseiru internasionál sira ne’e fó apoiu mai Governu iha área hanesan turizmu, agrikultura no iha área ne’e koñesidu ho avansa agrikultura, kontinuasaun husi projetu ne’e, área turizmu nian sira fó formasaun ba komunidade, liuliu sira ne’ebé hela iha área turístika sira para oinsá bele uza oportunidade iha sira-nia aredór hodi halo sira-nia negósiu iha turizmu nian.

Akordu ne’e kontribui ba Timor-Leste ida prósperu liu, saudavel no ho populasaun ida ne’ebé maka matenek liu ho asesu ba sasán no serbisu esensiál no produsaun no empregu ne’ebé korresponde ba ekonomia emerjente ida ho oportunidade ba ema hotu ho forma loloos no inkluziva, fasilita ba kreximentu dinámiku no ekonomia inovadora nian.

Iha reuniaun KM ne’e fó plena podér ba Ministra Finansa interina atu asina akordu ne’e ho USAID iha Timor-Leste.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here