Prezidente KFP, Faustino Cardoso, Kurta (24/4/2019), entrega relatóriu anuál 2018 nian ba Prezidente Parlamento Nasionál, Arão Noé de Jesus da Costa Amaral. Imajen/Egas Cristovão

DILI,(TATOLI)– Komisaun Funsaun Públika (CFP-sigla portugés), Kuarta lokraik (24/4/2019), entrega relatóriu anuál 2018 nian ba Parlamentu Nasionál (PN).

Komunikadu KFP nian ne’ebé Ajénsia TATOLI asesu informa katak, relatóriu ne’e hato’o informasaun kona-ba rezultadu servisu  sira iha durante tinan 2018, ne’ebé maka hetan empeñamentu boot hosi funsionáriu no ajente sira no envolvimentu hosi dirijente sira.

Relatóriu ne’e hato’o mós informasaun relevante ba planeamentu atividade iha futuru ho espetativa boot ba administrasaun públiku ida moderna hodi hala’o kna’ar ida-idak agora no ba futuru.

Tuir artigu 21 lei númeru 7/2009, 15 Jullu, kada tinan KFP iha obrigasaun hato’o relatóriu kona-ba servisu ne’ebé hala’o iha 2018. Hanesan iha tinan hirak liu ba, KFP hafoin entrega tiha relatóriu mós sei aprezenta ba deputadu sira iha plenária, ne’e sei hein hosi Prezidente Parlamentu Nasionál determina loron konveniente.

KFP harii iha Jullu 2009 ho objetivu atu asegura funsaun públika ida imparsiál, integra no profisionál hodi fó servisu públiku ida ho kualidade ba sidadaun Timor-Leste. Ho ida ne’e, KFP asume prioridade ba hadi’ak liután jestaun dezempeñu funsaun públika nian no dezenvolvimentu kompeténsia ba funsionáriu públiku sira.

Jornalista: Zezito Silva

Editór: Francisco Simões

 

HAKEREK NO HATÁN

Please enter your comment!
Please enter your name here