Embaxador Jepaun mai Timor Leste,Hiroshi Minami. Imajen/Xisto Freitas

DILI,(TATOLI) – Governu Japaun, Tersa (23/4/2019), hola ona desizaun finál hodi suporta millaun US$44 ba Governu Timor-Leste hodi hadi’a aeroportu internasionál Prezidente Nicolau Lobato, Comoro, Dili.

Refere ba desizaun ne’e, ohin loraik, Asesór prinsipál Primeiru Ministru Japaun nian, Sonoura, hasoru malu ho Primeiru Ministru Taur Matan Ruak, iha Palásiu Governu, hodi transmite desizaun Governu Japaun nian ne’e.

“Ohin lokraik, asesór espesiál Primeiru Ministru Japaun, Sonoura hasoru malu ho Primeiru Ministru Taur Matan Ruak. Asesór prinsipál ne’e dehan katak Governu Japaun halo ona desizaun hodi suporta projetu konstrusaun aeroportu Comoro”, informa  Embaixadór Japaun iha Timor-Leste, Hiroshi Minami, ba jornalista sira liuhosi konferénsia imprensa iha Embaixada Japaun.

Embaixadór  Hiroshi Minami, esklarese katak, Governu Japaun halo asisténsia fundu ba Governu Timor-Leste ho total orsamentu hamutuk millaun U$44. “Ha’u hakerek karta ida ne’e ba Ministru Transporte no Komunikasaun”, esklarese Embaixadór Hiroshi Minami, hodi halo klarifikasaun ba publikasaun mídia balun ne’ebé sita deklarasaun Ministru Transporte no Komunikasaun, José Agostinho da Silva, ne’ebé hateten, Governu Japaun la aprova konstrusaun aeroportu Comoro.

Embaixadór ne’e hein katak Governu Japaun ho Governu Timor-Leste fó importánsia formál ba projetu ida ne’e. Enkuantu konstrusaun sei hahú iha Marsu tinan oin no sei remata iha Dezembru 2021.

Embaixadór Hiroshi Minami  friza katak, konfuzaun mai hosi nota verbál ne’ebé Embaixada Japaun haruka ba Ministériu Negósiu Estranjeiru no Kooperasaun iha 11 Marsu, maibé nota verbál ne’e kona-ba asisténsia tékniku hanesan atu fó treinamentu ba staff sira iha aeroportu. Pedidu ida ne’e maka Governu Japaun la aprova.

“Nota verbál ida ne’e dehan katak governu Japaun la aprova asisténsia tékniku hodi fó treinamentu ba staff sira. Maibé, Governu Japaun halo ona desizaun kona-ba asisténsia fundu ba projetu atu hadi’a aeroportu”, Embaixadór Hiroshi Minami tenik tan.

Embaixadór Japaun mai Timor-Leste lia tun dehan, “ha’u lahatene intensaun hosi Ministru Transporte no Komunikasaun, José Agostinho da Silva tanba iha Segunda, foin lais, ha’u hasoru malu ho nia no ha’u esplika ba nia kona-ba prosesu no progresu tomak, enkuantu iha semana kotuk ha’u hasoru malu ho Primeiru Ministru hodi halo esplikasaun. No ohin asesór espesiál Primeiru Ministru Japaun nian, Sonoura hasoru malu ho Xefe Governu Timor-Leste”.

Diplomata ne’e konklui katak Governu Japaun iha konsisténsia nafatin atu apoiu Timor-Leste hodi halo konstrusaun ba aeroportu Comoro.

Jornalista : Zezito Silva

Editór: Francisco Simões

HAKEREK NO HATÁN

Please enter your comment!
Please enter your name here