DILI,(TATOLI)-Governu liuhosi reuniaun Konsellu Ministru, Kuarta (24/4/2019), aprova dekretu lei kona-ba importasaun produtu explozivu hodi apoiu implementasaun projetu konstrusaun sivíl, atividade petrolíferu no minerais iha territóriu.
Dekretu lei ne’e aprezenta hosi Ministru Defeza no Ministru Interior en Ezersísiu, Filomeno Paixão de Jesus, ho ninia ekipa tékniku sira iha reuniaun KM ne’ebé hala’o iha Salaun Enkontru KM, Palásiu Governu.
“Ezemplu di’ak ida maka Portu Tibar ne’ebé presiza duni fatuk, britas atu sira bele halo konstrusaun”, informa Ministru Prezidénsia Konsellu Ministru, Hermenegildo Augusto Cabral Pereira ba jornalista sira hafoin reuniaun Konsellu Ministru.
Dekretu lei ne’e atu fó lisensa no autorizasaun ba kompañia kontraktor projetu sira hodi importa produtu explozivu ho durasaun tinan ida.
“Lisensa ba tinan ida no impoin mós multa, regra hodi regula atividade lisensiamentu no importasaun no utilizasaun produtu explozivu sira ne’e”, hateten Ministru Hermenegildo Pereira.
Governu konsidera dekretu lei ne’e importante atu tulun kompañia executor sira atu aselera prosesu konstrusaun Portu Tibar no projetu petrolíferu no minerais iha rai laran.
Jornalista: Agapito dos Santos
Editór: Francisco Simões
