DILI,(TATOLI)-Governu liuhosi reuniaun Konsellu Ministru, Kuarta (24/4/2019), la konsege aprova relatóriu hosi revizaun nasionál hodi implementa deklarasaun no plataforma hosi asaun Beijing ba periodu 2014-2018 ba igualdade jéneru.
Konferénsia feto mundiál ba dahaat iha Setembru 1995 ho objetivu hodi diskute asaun ba promosaun buka igualdade no inkluzaun, dezenvolvimentu pás ba feto sira.
Iha sorumutuk ne’e konsege hasai deklarasaun ida “Beijing Platform for Action” (BPFA), ho prioridade 12 maka hanesan Feto ho ambiente, feto ho podér no foti desizaun sira, feto ho ekonomia, feto no problema ki’ak, feto nia diretu umanu, feto ho saúde, edukasaun no formasaun ba feto, mekanizmu institusionál ba dezenvolvimentu feto, feto ho informasaun ka mídia, feto iha área konflitu no seluk tan.
Ministru Prezidénsia Konsellu Ministru, Hermenegildo Augusto Cabral Pereira ba jornalista sira, hafoin reuniaun Konsellu Ministru hatete, governu sei adia tan diskusaun iha semana oin hodi hetan aprovasaun final.
“Konsellu Ministru rona hosi Sekretáriu Estadu Igualdade no Inkluzaun kona-ba ne’ebé atu hato’o ba ONU kona-ba revizaun nasionál ba implementasaun deklarasaun Beijing no asaun plataforma 2014 – 2018 kona-ba igualdade jéneru”, esplika Ministru Hermenegildo Pereira.
Governu konsulta relatóriu ne’e ho liña ministeriál, organizasaun sosiedade sivíl no ajénsia estadu hodi hetan ona konkluzaun final.
Estadu Timor Leste liuhosi Sekretaria Estadu Igualdade no Inkluzaun iha tempu badak sei aprezenta relatóriu ne’e ba organizasaun nasaun unidas (ONU) iha Nova Iorke.
“Konsellu Ministru analiza no sei halo tan diskusaun iha semana oin hodi hetan aprovasaun atu sekretaria Estadu Maria José da Fonseca Monteiro de Jesus bele lori ba ONU hodi aprezenta”, hateten Hermenegildo Pereira.
Jornalista: Agapito dos Santos
Editór: Francisco Simões
