DILI, (TATOLI) – Konsellu Administrasaun Fundu Infraestrutura (KAFI), ohin sorumutuk ho Primeiru-Ministru, Taur Matan Ruak, hodi debate no análize ba pontu situasaun hosi projetu infraestrutura no define projetu prioritáriu sira 2020 nian ho forma atu garante kumprimentu no prosedimentu legál sira no kualidade obra.

Durante reuniaun iha Palásiu Governu, Xefe Governu, Taur Matan Ruak, ho membru KAFI hotu halo análize projetu ba fundu infraestrutura ne’ebé iha hela prosesu avaliasaun no estudu.

Partikularmente ba projetu Portu Tibar ne’ebé insere reabilitasaun estrada rurál hanesan “Estrada dezenvolvimentu” no programa ba edifísiu públiku ho nia konstrusaun ba sede foun Institutu Jestaun no Ekipamentu.

Komunikadu ne’ebé Tatoli asesu ohin katak responsavel sira KAFI no governu diskute impaktu infraestrutura no ekonomia nasionál, prinsipalmente kona-ba kriasaun empregu, liuhosi envolvimentu ba buat ki’ik, média no empreza nasionál ne’ebé boot no projetu komunitáriu. Seluk tan maka utiliza matéria prima ba dezenvolvimentu projetu ida ne’e.

Ho forma atu garante impaktu diretu iha komunidade lokál no aumentu servisu iha postu sira, nune’e bele mellora kondisaun vida komunidade nian, permite populasaun sira iha munisípiu bele aumenta permanénsia kapitál iha territóriu nasionál.

KAFI kompostu hosi Ministru Planeamentu Investimentu Estratéjiku (MPIE) en ezersísiu, Ministru Prezidénsia Konsellu Ministru (MPIE), Agio Pereira, no membru konsellu administrasaun sira, Ministru Reforma Lejislatura Asuntu Parlamentár (MRLAP), Fidelis Magalhães, Ministru Transporte no Komunikasaun (MTK), José Agostinho da Silva.

Ministra Finansa (MF) en ezersísiu, Sara Lobo Brites, Diretór Ajénsia Dezenvolvimentu Nasionál (ADN), Diretór Jerál Obra Públika (DGOP), Komisaun Nasionál Aprovizionamentu (KNA), Unidade Manejamentu Projetu (PMU) inklui tékniku sira.

KAFI estabelese hosi Governu hanesan orgaun ezekutivu ho nia autoridade kona-ba prosesu desizóriu relativamente matéria hotu kona-ba projetu infraestrutura, instrumentu finanseiru institui iha 2011 ho objetivu atu apoia projetu estratéjiku atu reforsa kreximentu ekonomia Timor-Leste.

Nune’e mós fasilita dezenvolvimentu infraestrutura no provizaun ba fonte finanseiru ba projetu estrada no ponte, aeroportu no portu marítimu, fornesimentu água no enerjia, edukasaun no saúde, turizmu no grande projetu ho orsamentu superiór milliaun ida dolar Amerikanu.

Sustentabilidade fundu infraestrutura diretamente ne’ebé liga ba prioridade estratéjiku dezenvolvimentu ekonómiku, iha impaktu sosiál no ambientál, aliña ho objetivu dezenvolvimentu sustentavel no Planu Estratéjiku Dezenvolvimentu Nasionál 2011 to’o 2030.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here