Xefe Aldeia Kaibait, Olindo de Assis Soares. Foto TATOLI: Rafy Belo

LIKISÁ, (TATOLI) – Komunidade aldeia Kaibait, suku Vatuboro, postu administrativu Maubara, munisípiu Likisá preokupa ho limitasaun pesoál saúde hodi atende komunidade iha aldeia ne’e.

Xefe Aldeia Kaibait, Olindo de Assis Soares, ba TATOLI katak médiku, enfermeiru no parteira iha ona sira-nia aldeia no atende ona komunidade ho di´ak maibé problema mak bainhira parteira sira dezloka ba munisípiu ka nasionál difikulta ona inan isin-rua sira ne’ebé atu partu, tanba iha sira-nia sentru saúde la´ós ba Vatuboru mesak maibé mós komunidade balun husi Bobonaru no seluk tan.

“Se ita-nia parteira iha atividade ruma bolu husi munisípiu. Entaun dalaruma (inan isin-rua), rua tolu mai, enfermeiru mesak labele”, hateten Olindo de Assis Soares iha Suku Vatuboru, segunda, (22/4/2019).

Autoridade lokál ne’e rekomenda ba Ministériu Saúde (MS) aumenta tan enfermeiru ka parteira, nune’e bele fasilita ho másimu.

Hatán ba preokupasaun ne’e, Diretora Sentru Saúde munisípiu Likisá, Apolonia dos Santos, hateten Likisá iha sentru saúde tolu no iha postu saúde 26.

Tan ne’e, iha postu saúde 26 ne’e iha postu saúde neen seidauk prienxe parteira maibé agradese ba Vatuboru I tanba iha parteira, médiku no mós enfermeira sufisiente.

“Se bainhira parteira sai, iha enfermeiru, iha médiku; hanoin tanba de’it parteira mak hatene partu, maibé médiku, enfermeiru sira ne´e, ami kapasita sira ona atu atende partu”, hateten Apolonia dos Santos.

Iha biban ne’e, Apolonia dos Santos informa mós ba lider komunitáriu iha nivel suku no aldeia katak MS no Ministériu Administrasaun Estatál (MAE) iha ona kompromisu ida katak bainhira pesoál saúde ida, sai iha postu saúde, lider komunitária sira tenke hatene.

“Se sai mak ita-boot sira la hatene, akontese kazu ruma, labele soe mai Ministériu Saúde tanba responsabilidade ne’e entrega ba ita-boot sira ona. Despaxu administradór fó rasik ona, ne’ebé bainhira pesoál saúde kuandu la iha fatin, labele dehan (…) pesoál saúde iha ne´ebé?”.

Nia reforsa akordu ne’ebé MS estabelese ho MAE fó ona podér ba autoridade lokál sira katak pesoál saúde ida sai husi postu ka sentru saúde ba fatin ruma lider komunitária sira tenke hatene.

“Se sai ita-boot sira la hatene, nia absénsia ita-boot sira tau falta. Ita-boot sira simu tiha ona despaxu, iha ne´ebá hateten ona katak kuandu médiku, enfermeiru, parteira sai iha sira-nia fatin, ita-boot sira la iha koñesimentu, informasaun, tau sira-nia absénsia ne’e falta tanba relatóriu ikus (pesoál saúde) ne´e ita-boot sira mak sei asina”.

Ezekutiva Sentru Saúde Munisípiu Likisá friza iha Vatuboro I pesoál saúde sira kompletu loos tiha ona tanba iha ona médiku, enfermeiru no parteira ida enkuantu iha postu balun seidauk.

Pesoál saúde, tuir Livru 3B (munisípiu) 2019 nian, iha Munisípiu Likisá kompostu husi médiku 48 (inklui espesialista sira), enfermeiru na’in 39, asistente enfermeiru neen no parteira 26.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here