Diretór Nasional Servisu Prijaun no Re-insersaun Sosial,Ministeriu Justisa Helder Cosme Marcal Belo. Imajen/Egas Cristovão

DILI,(TATOLI)-Diretór Nasional Servisu Prizaun no Re-insersaun Sosiál, Ministériu Justisa,  Helder Cosme Marcal Belo, informa katak, Ministériu Justisa   kontinua simu pedidu hosi proponente ne’ebé husu atu fó indultu ba dadur sira iha komarka Bekora, Gleno ho Suai.

Tuir Lei ne’ebé mak vigora iha país ida ne’e katak, Prezidente Repúblika iha kompeténsia atu fó indultu ba dadur sira iha loron boot nasionál. Tuir dekretu Prezidénsia Repúblika  númeru 11/2018  determina ona loron indultu ba dadur ne’ebé sei akontese iha  loron proklamasaun independénsia, 28 Novembru, tinan-tinan, ho loron restaurasaun independénsia, 20 Maiu, tinan-tinan.

“Horiseik ita simu tan proponente hosi advogadu sira hamutuk rua depois kanaliza tuir prosesu ne’ebé maka iha”, informa Helder Cosme Marcal Belo, ba Ajénsia TATOLI iha ninia kna’ar fatin, Ministériu Justisa,  Caicoli, Dili, Tersa (23/4/2019).

Ministériu Justisa simu ona lista proponente atu hetan indultu no komutasaun pena ba dadur  to’o ohin loron hamutuk  na’in 60-resin.

Lei númeru  5/2016 kona-ba prosedimentu legal ba indultu no komutasaun pena ne’ebé define proponente sira mai hosi dadur, família dadur, advogadu, defensór públiku no mós diretór estabelesimentu prijionál sira.

Hafoin  simu pedidu hirak ne’e,  Herlder Cosme Marcal Belo, hateten, diresaun  halo kedas  avaliasaun ba komportamentu dadur, elaborasaun relatóriu sosiál, deklarasaun ho sentimentu hosi dadur rasik depois relata ba Ministériu Justisa  no ministru kontinua haruka ba tribunal  hodi hetan paresér jurídiku depois maka lori ba Prezidente Repúblika hodi foti desizaun.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here